Zëvendëspresidenti i Shteteve të Bashkuara, JD Vance, ka thënë se nuk do të shohë një transmetim të mundshëm të ekzekutimit të Nidal Malik Hasan, ish-psikiatrit ushtarak të dënuar për sulmin e vitit 2009 në Fort Hood.
Të lidhura
None found
Presidenti Donald Trump, ndërkohë, ka shprehur mbështetjen e tij për ekzekutimin me pushkatim, duke e quajtur Hasanin “maniak” dhe duke deklaruar se ai e meriton dënimin me vdekje.
Çështja e ekzekutimit të Nidal Malik Hasan është rikthyer në qendër të vëmendjes në SHBA pas deklaratave të dy zyrtarëve të lartë amerikanë për fatin e ish-ushtarakut.
Vance ka deklaruar se nuk është i bindur nëse ekzekutimi do të transmetohet drejtpërdrejt, por ka sqaruar se, në rast se kjo ndodh, ai nuk do ta ndjekë.
“Nuk e di nëse kjo do të ndodhë vërtet”, u shpreh Vance para gazetarëve të premten në Ohajo. “Nëse në fund transmetohet drejtpërdrejt, unë nuk do ta shikoj”, shtoi zëvendëspresidenti.
Megjithatë, ai e dënoi me forcë sulmin e kryer nga Hasani dhe theksoi se viktimat e tij nuk duhet të harrohen.
“Shpresoj që njerëzit të mos harrojnë se ky është një person që ka vrarë brutalisht shumë njerëz të pafajshëm”, deklaroi Vance.
Edhe Donald Trump ka folur në mënyrë të drejtpërdrejtë në favor të ekzekutimit të ish-majorit të ushtrisë amerikane, duke përdorur një gjuhë të ashpër ndaj tij.
“Po i japim dënimin me vdekje një njeriu që vrau 14 ushtarë disa vite më parë. Dënim me vdekje përmes pushkatimit dhe ai e meriton. Ka vrarë dhe plagosur shumë, shumë njerëz. Është maniak”, tha Trump gjatë një aktiviteti në Shtëpinë e Bardhë.
Të hënën, presidenti kishte miratuar zbatimin e dënimit kapital, pas rekomandimit të sekretarit amerikan të Luftës, Pete Hegseth.
Megjithatë, Trump nuk ka dhënë ende një qëndrim të prerë për çështjen më të diskutueshme, atë të transmetimit të ekzekutimit në kohë reale.
Pete Hegseth ka mbrojtur përdorimin e pushkatimit si metodë ekzekutimi, duke thënë se publiku duhet të kuptojë se veprime të tilla sjellin pasoja të rënda.
Sekretari amerikan i Luftës e ka përshkruar metodën si një vendim të qartë, ndërsa propozimi që ekzekutimi të transmetohet si një ngjarje publike ka nxitur reagime dhe kundërshtime.
Raportimet bëjnë të ditur se ekzekutimi i Hasan është planifikuar të zhvillohet më 3 dhjetor 2026, në orën 13:00 sipas kohës lokale, në Fort Hood. Nëse zbatohet, ky do të jetë ekzekutimi i parë i një pjesëtari të forcave të armatosura amerikane që nga viti 1961, si dhe ekzekutimi i parë ushtarak me pushkatim që nga Lufta e Dytë Botërore.
Nidal Malik Hasan, i cili kishte shërbyer si psikiatër në ushtrinë amerikane, kreu sulmin më 5 nëntor 2009 në bazën ushtarake Fort Hood, në Teksas.
Ai qëlloi me armë në një ndërtesë mjekësore, ku ushtarët prisnin për kontrolle shëndetësore dhe procedura që kryheshin para dislokimit. Si pasojë e sulmit, 13 persona u vranë dhe 32 të tjerë u plagosën.
Hetimet treguan se Hasan e kishte përgatitur sulmin për disa javë dhe se kishte shkuar disa herë në një poligon qitjeje në Teksas. Gjatë procesit gjyqësor, ai nuk e mohoi përgjegjësinë për veprimet e tij dhe u shpall fajtor për 13 akuza për vrasje të paramenduar dhe 32 akuza për tentativë vrasjeje.
Hasan kishte deklaruar se motivi i sulmit ishte kundërshtimi i dërgimit të trupave amerikane në Afganistan, por gjykata ushtarake nuk e pranoi këtë argument si pjesë të mbrojtjes ndaj akuzave.
