Italia po kalon një periudhë me kushte atmosferike ekstreme, teksa veriu i vendit u përball me stuhi të fuqishme breshëri që, në disa raste, kishin përmasat e topave të tenisit, duke shkaktuar dëme të mëdha materiale. Ndërkohë, rajonet jugore vijojnë të vuajnë nga temperaturat përvëluese që i kalojnë 40 gradë Celsius.
Ngjarja më dramatike u shënua përgjatë autostradës A13 në zonën e Ferrarës. Atje, kokrrat e akullit me diametër rreth tre centimetrash kthyen segmentin rrugor në një kurth të vërtetë, duke i detyruar drejtuesit e mjeteve të ndalonin për shkak të pamundësisë për të vazhduar. Pasagjerët mbetën të bllokuar teksa pjesë të tëra akulli binin mbi ta. Autoritetet njoftuan se nga kjo situatë pati persona që pësuan lëndime, ndërsa me dhjetëra automjete mbetën të shkatërruara, me dritare të copëtuara dhe sipërfaqet e karrocerive të deformuara rëndë.
Të lidhura
None found
Një nga shoferët e përfshirë në këtë kaos përshkroi momentet e tmerrit. “Në një çast qielli u bë i zi dhe pastaj filloi të binte breshër. Më shkatërroi xhamin e përparmë. E vetmja zgjidhje ishte të ndaloja dhe të mbroja fytyrën”, rrëfeu ai.
Fenomeni i dhunshëm meteorologjik përfshiu me forcë edhe Lombardinë dhe Emilia-Romagnën. Në Milano, moti i keq solli kaos në një koncert, duke bërë të nevojshëm evakuimin e rreth 80 mijë spektatorëve. Në anën tjetër, qyteti i Ravenës raportoi rënien e më shumë se 100 pemëve, dëmtimin e strukturës së çatisë së një institucioni arsimor dhe mbylljen e disa arterieve kryesore për një periudhë disaorëshe. Pasojat u ndjenë dhe në sistemin e transportit publik, si në atë hekurudhor, ashtu dhe në atë rrugor, me trajektet që u anuluan ose u shoqëruan me vonesa të konsiderueshme.
Goditja më shkatërruese duket se është regjistruar në bujqësi. Sipas raportimeve të shoqatave të fermerëve, stuhitë kanë shkaktuar dëme masive në plantacionet e misrit, sojës, orizit dhe lulediellit, si dhe në pemëtore. Infrastruktura bujqësore mbrojtëse, përfshirë rrjetat, është dëmtuar rëndë. Vlerësimet fillestare financiare flasin për humbje që arrijnë në qindra miliona euro. Në një hark kohor prej vetëm tri ditësh, pjesa veriore e Italisë është goditur nga 192 episode stuhish intensive breshëri, me grimca akulli që në disa zona kanë arritur diametra deri në 10 centimetra.
Përballë kësaj katastrofe, përfaqësuesit e sektorit bujqësor i janë drejtuar qeverisë me kërkesën për shpalljen e gjendjes së jashtëzakonshme, duke iu lutur njëkohësisht Bashkimit Evropian për ndërhyrje me fonde mbështetëse.
Ndërsa veriu lufton me akullin, jugu i gadishullit mbetet në mbërthimin e një vale të nxehti afrikan, me kolonat e merkurit që ngjiten mbi 40 gradë Celsius. Kjo situatë e zgjatur ka favorizuar shpërthimin e vatrave të zjarrit, që po përhapen me shpejtësi nëpër sipërfaqet pyjore dhe në zonat me shkurre tipike mesdhetare.
