Një ide e re nga dy arkitektë islandezë parashikon shfrytëzimin e llavës vullkanike për ngritjen e strukturave ndërtimore, duke vënë në përdorim robotikën dhe teknologjitë e avancuara.
Të lidhura
None found
Koncepti është frymëzuar nga aktiviteti i vazhdueshëm vullkanik në Islandë dhe nga sasitë e mëdha të bazaltit që prodhohen gjatë shpërthimeve. Sipas arkitektëve, llava mund të përdoret si një formë “betoni i shkrirë, por pa çimento”, për të krijuar materiale të qëndrueshme ndërtimi me një ndikim potencialisht më të ulët në mjedis.
Përpunimi i saj nuk do të mund të kryhej nga njerëzit, për shkak të temperaturave shumë të larta. Kjo detyrë do t’u besohej robotëve, të cilët do të merrnin, zhvendosnin dhe modelonin llavën duke përdorur, mes të tjerash, printimin 3D dhe sistemet e ftohjes.
Synimi i projektit është edhe pakësimi i varësisë nga çimentoja dhe betoni, prodhimi i të cilëve shoqërohet me emetime të konsiderueshme të CO₂. Megjithatë, propozimi mbetet një vizion afatgjatë, pasi arkitektët vlerësojnë se kjo teknologji mund të bëhet realitet rreth vitit 2150.
Projekti përfaqësoi Islandën në Bienalen e Arkitekturës në Venecia në vitin 2025. Nëse realizohet, ai mund t’i shndërrojë shpërthimet vullkanike nga një rrezik natyror në një burim të veçantë materialesh për qytetet e së ardhmes.
