Përplasja mes Shteteve të Bashkuara dhe Iranit është thelluar ndjeshëm, pasi Uashingtoni ka nisur një seri të re goditjesh kundër objektivave iraniane.
Të lidhura
None found
Autoritetet amerikane bënë të ditur se janë goditur 80 objektiva të lidhura me regjimin iranian. Në të njëjtën kohë, portali Axios raportoi se operacioni ka qenë rreth pesë herë më i madh, si në shtrirje ashtu edhe në fuqi, në krahasim me sulmet e kryera në fund të muajit qershor.
Presidenti i SHBA-së, Donald Trump, nga samiti i NATO-s në Ankara, la të kuptohet se këto sulme mund të mos ndalen këtu dhe se mund të ketë zhvillime të tjera brenda orëve të ardhshme.
“Ndoshta do t’i godasim përsëri me forcë në orët e ardhshme”, deklaroi Trump.
Nga ana e saj, Garda Revolucionare Islamike (Pasdaran) njoftoi se ka goditur instalacione ushtarake amerikane në Bahrein dhe Kuvajt. Po ashtu, autoritetet iraniane akuzuan Shtetet e Bashkuara se kanë shkelur memorandumin e mirëkuptimit mes palëve.
Si kundërpërgjigje ndaj paralajmërimeve nga Uashingtoni, një burim i sigurisë iraniane u shpreh për mediat shtetërore se Irani do të mbyllë Ngushticën e Hormuzit në rast se SHBA kryen sulme të tjera.
Reagim pati edhe nga kryetari i Parlamentit iranian, Mohammad Bagher Ghalibaf, i cili shkroi në rrjetin social X:
“Epoka e bullizmit dhe shantazhit ka marrë fund. Kjo nuk çon askund dhe ne nuk do të dorëzohemi.”
Përshkallëzimi i tensioneve ka reflektuar menjëherë edhe në tregjet financiare. Bursat evropiane kanë pësuar rënie, ndërsa çmimi i naftës ka shënuar rritje të fortë. Nafta Brent është afruar pranë nivelit të 80 dollarëve për fuçi, për shkak të shqetësimeve mbi një ndërprerje të furnizimit global nëse bllokohet Ngushtica e Hormuzit.
