Universiteti i Harvardit ka rënë dakord të paguajë 53 milionë dollarë për të mbyllur një seri padish të ngritura nga familjarët e njerëzve që kishin lënë trupat e tyre në dispozicion të mjekësisë dhe shkencës.
Të lidhura
None found
Çështja buron nga një skandal në Shkollën Mjekësore të Harvardit, ku të afërmit e viktimave e akuzuan universitetin për neglizhencë të rëndë dhe trajtim abuziv të trupave të dhuruar.
Skandali doli në dritë pas zbulimit të veprimtarisë së Cedric Lodge, ish-drejtorit të morgut të Harvardit. Duke përdorur detyrën e tij në Programin e Dhurimit Anatomik, Lodge, gjatë periudhës 2018-2021, nxirrte organe nga trupat e dhuruar për edukim dhe kërkim shkencor dhe më pas i shiste online në tregun e zi.
Në këtë aferë u përfshinë Lodge dhe gjashtë persona të tjerë që nuk punonin në universitet. Lodge u dënua me tetë vjet burg, ndërsa bashkëshortja e tij mori një dënim prej një viti e një dite burgim. Personat e tjerë të përfshirë e pranuan fajësinë në vitin 2025.
Edhe pse paditë civile të familjeve kundër Harvardit ishin rrëzuar në fillim, Gjykata Supreme e Masaçusetsit vendosi t’i rikthejë ato. Sipas gjykatës, universiteti kishte dështuar të reagonte ndaj shkeljeve të Lodge, të cilat kishin vazhduar për një kohë të gjatë.
Marrëveshja, e depozituar në një gjykatë në Boston, parashikon krijimin e fondeve të posaçme të kompensimit, me vlerë miliona dollarë, për familjarët e personave të prekur.
Deanët e Shkollës Mjekësore të Harvardit dhe të arsimit mjekësor, George Daly dhe Bernard Chang, deklaruan në një letër të përbashkët se veprimet e Lodge ishin “moralisht të dënueshme dhe në kundërshtim me standardet e institucionit”.
Si pjesë e marrëveshjes, universiteti do të themelojë gjithashtu një bursë vjetore për studentët e mjekësisë. Programi do të nisë në vitin akademik 2027-2028 dhe do t’u kushtohet kujtimit të personave që dhuruan trupat e tyre për arsimin dhe kërkimin shkencor.
Harvard ka bërë të ditur se marrëveshja e mbyll procesin ligjor, por ka nënvizuar se rimëkëmbja e familjeve të prekura dhe e komunitetit akademik do të kërkojë një kohë të gjatë.
