Një konflikt i ri ligjor ka përfshirë Halle Berry dhe ish-bashkëshortin e saj, Olivier Martinez, këtë herë lidhur me kujdestarinë e djalit të tyre 12-vjeçar, Maceo.
Gjykata në Los Angeles i ka dhënë përkohësisht Martinezit kujdestarinë kryesore të djalit, pasi ai e ka akuzuar Berry-n për abuzim fizik ndaj fëmijës. Përfaqësuesit e aktores i kanë hedhur poshtë me forcë pretendimet, duke i cilësuar ato si “plotësisht të pabazuara”.
Të lidhura
None found
Sipas vendimit të përkohshëm, Berry mund ta takojë Maceon dy herë gjatë javës dhe çdo fundjavë të dytë. Çështja do të rikthehet për shqyrtim në seancën e caktuar më 16 tetor.
Martinez pretendon se gjatë rreth 18 muajve të fundit ka pasur disa episode përplasjesh fizike mes Berry-t dhe djalit të tyre. Ai deklaron se aktorja e ka kapur Maceon nga qafa në disa raste, duke e paraqitur veprimin si lojë, ndonëse fëmija nuk e ka përjetuar në këtë mënyrë.
Një nga pretendimet më të rënda ka të bëjë me një ngjarje që, sipas Martinezit, ndodhi në dhomën e Maceos ndërsa djali po përdorte një pajisje të realitetit virtual.
Në deklaratën e tij, Martinez thotë se Berry hyri në dhomë dhe nisi ta shtynte djalin, përpara se situata të tensionohej më tej. Sipas tij, ajo e ofendoi Maceon dhe e kapi nga fyti, ndërsa bërtiste: “Kush është përgjegjës tani?”. Martinez pretendon se djali arriti të largohej dhe filloi të bërtiste.
Dokumentet gjyqësore përmbajnë edhe pretendimin se Van Hunt, partneri aktual i Berry-t, hyri në dhomë dhe e ndihmoi Maceon. Martinez thotë se më pas djali e telefonoi dhe i kërkoi të shkonte ta merrte menjëherë.
Akuzat janë mohuar nga pala e Halle Berry. Marina Beck, avokatja e aktores, e ka cilësuar kërkesën e Martinezit “plotësisht të pabazuar”. Ndërkohë, një burim pranë Berry-t ka deklaruar se ish-bashkëshorti po përpiqet ta dëmtojë atë përmes konfliktit lidhur me djalin.
Berry dhe Martinez u ndanë në vitin 2015, ndërsa divorci i tyre u përmbyll zyrtarisht në vitin 2023, pas disa vitesh mosmarrëveshjesh në gjykatë.
Një vit më parë, në 2024, Berry kishte kërkuar kujdestarinë e vetme të Maceos. Ajo kishte argumentuar se djali po haste probleme në shkollë dhe kishte nevoja të veçanta arsimore, ndërsa pretendonte se Martinez nuk i kuptonte ose i linte pas dore këto vështirësi.
Në seancën e 16 tetorit, të dyja palët pritet të paraqesin provat dhe argumentet e tyre. Gjykata do të shqyrtojë urdhrin e përkohshëm mbrojtës, si edhe çështjen e kujdestarisë së Maceos.
