Sekretari i Përgjithshëm i Kombeve të Bashkuara, Antonio Guterres, ka kërkuar vendosjen e një armëpushimi të përhershëm mes Izraelit dhe Hamasit në Rripin e Gazës, ndërsa afrohet përvjetori i sulmit të 7 tetorit 2023.
Të lidhura
None found
Në një mesazh të publikuar para përvjetorit, Guterres tha se tani është momenti për ta kthyer armëpushimin në një marrëveshje të qëndrueshme, për të garantuar ndihma humanitare në përmasa të mëdha dhe për respektimin e së drejtës ndërkombëtare.
Ai nënvizoi gjithashtu rëndësinë e krijimit të një procesi politik që do të çonte drejt një paqeje afatgjatë në të gjithë rajonin.
“Ne duhet të ndërtojmë një rrugë politike drejt paqes së qëndrueshme në të gjithë rajonin. Kombet e Bashkuara mbeten të palëkundura në angazhimin e tyre ndaj këtij imperativi”, u shpreh kreu i OKB-së.
Guterres apeloi për krijimin e një të ardhmeje ndryshe, në të cilën izraelitët dhe palestinezët të jetojnë pranë njëri-tjetrit në paqe e siguri, ndërsa të drejtat, dinjiteti dhe aspiratat e tyre të përmbushen plotësisht.
Duke folur për sulmin e Hamasit në jug të Izraelit më 7 tetor 2023, ai e cilësoi atë si një ngjarje “të tmerrshme”.
Sipas një përllogaritjeje të AFP-së, e mbështetur në të dhëna zyrtare, në anën izraelite u vranë 1,221 persona, pjesa më e madhe e të cilëve ishin civilë.
“Unë vajtoj ata që u vranë në sulme dhe ata që vdiqën në robëri. Vuajtjet që ata duruan dhe pikëllimi i pafund i familjeve të tyre nuk duhet të harrohen kurrë”, deklaroi Guterres.
Ndërkohë, ofensiva ushtarake izraelite në shkallë të gjerë në Rripin e Gazës ka shkaktuar të paktën 74,200 viktima, kryesisht civilë, sipas Ministrisë së Shëndetësisë të Hamasit në enklavën palestineze. Kombet e Bashkuara i konsiderojnë të besueshme këto shifra.
Kreu i OKB-së theksoi se banorët civilë të Gazës vijojnë të përballen me “kushte të patolerueshme” dhe se vuajtja e tyre “duhet të marrë fund, tani”.
Megjithëse Presidenti i SHBA-së, Donald Trump, shpalli një armëpushim në tetor 2025, e ardhmja politike e Rripit të Gazës mbetet ende e paqartë.
Izraeli vazhdon të mbajë nën kontroll pjesën më të madhe të territorit dhe nuk pranon të tërheqë trupat e tij pa u çarmatosur Hamasi.
Hamasi, nga ana e tij, pretendon se çarmatimi mund të kryhet gradualisht dhe kundërshton dorëzimin e menjëhershëm e të njëanshëm të arsenalit.
Pas ofensivës së Hamasit, forcat izraelite janë përfshirë në përplasje në disa fronte, veçanërisht në Liban kundër Hezbollahut, lëvizje shiite e mbështetur nga Irani, si edhe kundër Iranit, në bashkëpunim me Shtetet e Bashkuara.
