Granada dhe zona e saj metropolitane në Spanjë u goditën të martën në mëngjes nga një tërmet me magnitudë 4.8 ballë të shkallës Rihter. Lëkundjet shkaktuan panik te banorët, dëme materiale dhe plagosjen e lehtë të tre personave.
Tërmeti u regjistrua në orën 10:37 me kohën lokale. Epiqendra u përcaktua në zonën e Gojarit, ndërsa thellësia fokale ishte rreth pesë kilometra.
Të lidhura
None found
Lëkundja e së martës është pjesë e aktivitetit sizmik që po vazhdon në zonën e Granadës që prej së shtunës së kaluar.
Antonio Sant, zëvendëskryeministri i Andaluzisë, konfirmoi se tre persona pësuan lëndime të lehta për shkak të tërmetit.
Në mesin e të plagosurve ndodhet edhe një i mitur, i cili u transportua në spital për të marrë trajtim mjekësor.
Dëme materiale u raportuan gjithashtu në disa zona. Në pamjet e shpërndara në rrjetet sociale shihen ndërtesa, rrugë dhe automjete të parkuara të dëmtuara.
Si masë sigurie pas lëkundjeve, Alhambra u evakuua përkohësisht. Ndërkohë, shumë qytetarë u larguan nga ndërtesat dhe dolën në rrugë nga frika e tërmeteve të tjera.
Pas goditjes kryesore me magnitudë 4.8, u shënuan të paktën gjashtë lëkundje pasuese.
Pasgoditja më e fuqishme arriti magnitudën 4 dhe ndodhi në orën 10:53, me epiqendër në Churriana de la Vega. Instituti Kombëtar Gjeografik i Spanjës (IGN) bëri të ditur se lëkundja ishte shumë e cekët.
Në vijim u regjistrua një tërmet me magnitudë 2.9 në Pandul, një tjetër me magnitudë 2.6 në zonën e Las Gambas dhe një lëkundje me magnitudë 2.8, epiqendra e së cilës ishte në Alendín.
Goditja kryesore sizmike u ndje në të katër provincat e Andaluzisë lindore. Shërbimet e emergjencës morën rreth 50 telefonata në numrin 112, ndërsa autoritetet po vazhdojnë ta mbajnë situatën nën vëzhgim për shkak të aktivitetit sizmik.
