Me një vendim që shënon një precedent në Evropë, Franca ka finalizuar një ligj që u heq të drejtën e aksesit në platformat sociale të gjithë të miturve nën moshën 15-vjeçare. Kjo e bën atë anëtaren e parë të Bashkimit Evropian që merr një masë kaq kategorike.
Të lidhura
None found
Pas një votimi vendimtar në Asamblenë Kombëtare, ku projektligji mori 279 vota pro dhe 81 kundër, teksti tashmë pret vetëm vlerësimin e Këshillit Kushtetues për të hyrë në fuqi. Presidenti Emmanuel Macron ka premtuar se zbatimi i tij do të jetë realitet që në shtator.
Dispozitat e reja ligjore përcaktojnë se duke filluar nga 1 shtatori, asnjë fëmijë poshtë 15 vjeç nuk mund të hapë një profil të ri në rrjetet sociale. Për më tepër, të gjitha adresat ekzistuese që u përkasin kësaj grup-moshe do të çaktivizohen duke filluar nga janari i vitit 2027.
Vetë kreu i shtetit e përshëndeti këtë arritje si një fitore për sigurinë digjitale të brezit të ri. Përmes një postimi në platformën X, Macron shprehu mirënjohjen ndaj ligjvënësve për mbështetjen dhe nënvizoi rolin udhëheqës të Francës në Evropë sa i përket forcimit të mbrojtjes së të miturve në internet.
Ministrja e Digjitalizimit, Anne Le Hénanff, siguroi se kalendari i vendosur është plotësisht i përballueshëm, duke theksuar se mjetet teknologjike për konfirmimin e moshës janë tashmë funksionale dhe se barra e zbatimit të kësaj mase do të bjerë mbi supet e vetë platformave. Ajo sqaroi se çdo përdorues në territorin francez do të kalojë përmes një procesi verifikimi moshe dhe se llogaritë e individëve nën 15 vjeç do të asgjësohen, duke garantuar në të njëjtën kohë integritetin e të dhënave personale.
Një tjetër pikë e rëndësishme e legjislacionit ka të bëjë me ndalimin e celularëve në shkollat e mesme, një rregull që pritet të hyjë në fuqi me nisjen e vitit të ardhshëm shkollor. Gjithashtu, ligji nuk parashikon penalizime për të miturit apo prindërit e tyre, duke përjashtuar nga kufizimet faqet e karakterit edukativ dhe enciklopeditë digjitale.
Ky vendim radikal mbërrin në një kontekst global ku gjithnjë e më shumë vende po vendosin kufij ndaj aksesit të pakontrolluar të adoleshentëve në mediat sociale. Shqetësimet kryesore burojnë nga efektet anësore të dokumentuara mbi shëndetin psikologjik të përdoruesve të rinj, ku autoritetet shëndetësore franceze kanë tërhequr vëmendjen se aplikacione si TikTok, Snapchat dhe Instagram paraqesin rreziqe serioze, në veçanti për vajzat në moshë adoleshente.
Në planin evropian, presioni po rritet. Komisioni Evropian është duke analizuar mundësinë e një kuadri të përbashkët rregullator, një kërkesë kjo e mbështetur fuqimisht nga shtete si Franca, Greqia dhe Spanja. Pak ditë më parë, Presidentja Ursula von der Leyen mbrojti idenë e një qasjeje graduale të fëmijëve me botën digjitale, ndërkohë që Brukseli tashmë po eksperimenton me një “app” të dedikuar për kontrollin e moshës.
Në arenën ndërkombëtare, rreth 20 shtete kanë nisur ose finalizuar masa të ngjashme. Më herët, Australia vendosi tonin duke u bërë kombi i parë në botë që i detyroi gjigantët e teknologjisë të fshijnë profilet e përdoruesve nën 16 vjeç, duke paralajmëruar gjoba të rënda për shkelësit e rregullave të reja.
