Presidentja e Hungarisë, Katalin Novak, ka dhënë dorëheqje, pas rritjes së zemërimit publik për vendimin e saj që të falë një burrë të dënuar për bashkëpunim në abuzime seksuale të fëmijëve.
Novak, një figurë në rritje e sipër në partinë në pushtet, Fidesz, është kthyer prej një vizite në Doha, më 10 shkurt, për të lajmëruar publikun se po largohet prej pozitës.
“Falja e një personi i ka shqetësuar shumë njerëz. Kam bërë gabim”, ka thënë ajo përmes një adresimi publik televiziv.
Today I resigned from my office as President of Hungary. Thank you for everything to all my friends in all four corners of the world. Hungary🇭🇺 is a wonderful country with marvelous people, a good partner, an even better friend and a reliable ally. I am glad that in the past… pic.twitter.com/j4SdiezAkK
— Katalin Novák (@KatalinNovak_HU) February 10, 2024
Novak, 46-vjeçare, është zgjedhur si presidente prej parlamentit, më 2022.
Pozita e presidentit është ceremoniale në Hungari.
Ajo është gruaja e parë dhe personi më i ri që është zgjedhur ndonjëherë në këtë pozitë në Hungari.
Ajo ka shërbyer më parë si ministre për Familjet.
Në prill të vitit të kaluar, ajo e ka falur Endre K., i cili është dënuar me më shumë se tre vjet burgim më 2018, pse u ka bërë presion viktimave që t’i tërheqin pretendimet për abuzime seksuale ndaj drejtorit të një strehimoreje shtetërore.
Endre ka qenë zëvendësdrejtor i institutit.
Drejtori është dënuar me tetë vjet burgim për abuzim të të paktën 10 fëmijëve në periudhën 2004-2016.
Lajmi për falje është bërë i ditur më 2 shkurt, kur një medium lokal ka raportuar për të.
Presidentes nuk i është kërkuar të publikojë listën e plotë të personave të falur.
Kryeministri autoritar i Hungarisë, Viktor Orban, nuk është dëmtuar prej këtij skandali.
Orban, 60-vjeçar, i cili është në pushtet prej vitit 2010, e ka pozicionuar veten si kampion të vlerave tradicionale familjare.
Në një deklarim të vetëm publik për këtë çështje, ai ka bërë thirrje për ndryshime në Kushtetutë, që të parandalohet falja e abuzuesve të fëmijëve në të ardhmen.
