Një valë e re e të nxehtit ekstrem ka përfshirë kontinentin evropian, duke sjellë temperatura të larta rekord që pritet të arrijnë deri në 45 gradë Celsius në disa zona të Italisë gjatë ditëve në vijim.
Të lidhura
None found
Për herë të tretë në harkun e pak javëve, autoritetet italiane kanë lëshuar alarmin e kuq për disa prej qyteteve kryesore. Sot, rreziku maksimal është aktiv për Firencen, Peruxhian, Breshian dhe Torinon, kurse të mërkurën në këtë listë do të përfshihen edhe Bolonja, Frosinone dhe kryeqyteti Romë.
Sipas ekspertëve të meteorologjisë, temperaturat do të variojnë nga 39 deri në 41 gradë Celsius në pjesën më të madhe të Italisë qendrore e jugore, si dhe në ishullin e Sardenjës. Ndërkohë, në rajonet e brendshme termometri mund të prekë shifrën e 45 gradëve deri në mbyllje të javës.
Përtej vapës ekstreme, vendi po lufton edhe me një thatësirë të rëndë dhe mungesë të burimeve ujore, veçanërisht në rajonin e Piemontes, ku autoritetet vendore kanë ngritur alarmin për një krizë serioze të ujit.
Jeta e përditshme e qytetarëve është prekur ndjeshëm nga ky i nxehtë i pazakontë. Në Firence, punonjësit që shpërndajnë ushqime për platformat e dorëzimit kanë paralajmëruar ndërprerje të punës, duke kërkuar garanci më të forta për mbrojtjen e tyre gjatë orëve më të nxehta në hapësirat e jashtme.
E gjithë Evropa po ndjen furinë e kësaj vale të nxehti. Në Mbretërinë e Bashkuar, temperaturat që kapërcejnë 30 gradë Celsius kanë krijuar terren të favorshëm për përhapjen e zjarreve. Në Francë, flakët kanë shkrumbuar një pjesë të konsiderueshme të pyllit të famshëm Fontainebleau. Ndërkaq, Gjermania raporton një shtim të numrit të mbytjeve, me 99 viktima të shënuara vetëm gjatë muajit qershor.
