Një nga episodet më të fuqishme të El Niños të regjistruara në më shumë se një shekull mund të zhvillohet së shpejti, duke ndikuar ndjeshëm në klimën globale dhe duke rritur gjasat që viti 2027 të shënojë temperaturat më të larta të regjistruara ndonjëherë.
Të lidhura
None found
Vlerësimi është bërë nga Adam Scaife, drejtues i parashikimeve afatgjata në Shërbimin Meteorologjik Britanik, Met Office. Në një deklaratë për BBC-në, ai tha se modelet aktuale po sinjalizojnë një fenomen me intensitet jashtëzakonisht të rrallë.
“Nuk kam parë kurrë diçka të tillë në parashikimet tona”, u shpreh Scaife. Sipas tij, El Niño mund të arrijë kulmin me një rritje prej më shumë se tre gradësh të temperaturës së sipërfaqes së detit në një zonë referimi të Oqeanit Paqësor. Një nivel i tillë, theksoi ai, nuk do të kishte precedent në të dhënat moderne klimatike.
El Niño është një dukuri natyrore e përkohshme, e cila zakonisht shfaqet çdo dy deri në shtatë vjet. Ajo shkaktohet nga ndryshime të rëndësishme në temperaturën e sipërfaqes së Oqeanit Paqësor dhe ndikon në modelet atmosferike në mbarë botën. Disa rajone mund të përjetojnë vapë dhe thatësira, ndërsa të tjera reshje të mëdha, temperatura më të ulëta dhe episode ekstreme të motit.
Pasojat më të rënda pritet të shfaqen në zonat tropikale. Scaife paralajmëroi se pjesë të Amerikës së Jugut dhe të Paqësorit perëndimor mund të goditen nga thatësira ekstreme.
Edhe Evropa mund të ndiejë ndikimin e këtij fenomeni. Eksperti britanik tha se janë vërejtur tashmë tregues që reshjet dhe stuhitë mund të bëhen më të shpeshta në Mbretërinë e Bashkuar dhe në Evropën veriperëndimore, veçanërisht nga nëntori.
Met Office dhe ekspertë të tjerë të klimës parashikojnë se fuqia e mundshme e El Niños do të ndikojë në mënyrë të konsiderueshme te temperaturat globale gjatë vitit të ardhshëm.
Nëse këto parashikime rezultojnë të sakta, 2027 mund të vendosë një rekord të ri si viti më i ngrohtë i regjistruar ndonjëherë. Ndikimet pritet të shfaqen në rajone të ndryshme përmes valëve të të nxehtit, thatësirave, reshjeve ekstreme dhe stuhive më të fuqishme.
