Ekzekutimi i Krista Gale Pike, 50 vjeç, nuk u përmbyll të mërkurën në mbrëmje në Tenesi, pasi zemra e saj vazhdoi të punonte edhe pas dhënies së dy dozave të pentobarbitalit. Avokati i saj konfirmoi për BBC se Pike u dërgua më pas në një strukturë mjekësore.
Të lidhura
None found
Pike, e cila po përballet me dënimin kapital për vrasjen e 19-vjeçares Colleen Schlemmer, është gruaja e parë në Tenesi që përjeton një ekzekutim të pasuksesshëm me injeksion vdekjeprurës.
Procedura filloi rreth orës 20:00, sipas orës lokale, në Qendrën Korrektuese Riverbend në Nashville. Associated Press raportoi se të dënuarës iu administruan dy doza pentobarbital, ndërsa perdet që ndanin dhomën e ekzekutimit nga hapësira e dëshmitarëve u mbyllën në dy raste.
Gazetarët e pranishëm thanë se 50-vjeçarja dëgjohej duke gërhitur fort. Në një çast, atyre iu kërkua të dilnin nga dhoma ku po zhvillohej procedura.
Pas kësaj, avokatët e Pike iu drejtuan gjykatës me një kërkesë urgjente për ndalimin e ekzekutimit dhe për ofrimin e menjëhershëm të ndihmës mjekësore. Në dokumentet e tyre, ata shkruan se Pike kishte humbur ndjenjat, por zemra i vazhdonte të rrihte dhe gërhitjet e saj dëgjoheshin ende.
Gjykatësi federal Clifton Corker urdhëroi nisjen e kujdesit mjekësor, ndërsa Pike u transportua më vonë në një qendër ambulatore.
Ekipi ligjor i saj pretendoi se autoritetet e Tenesit nuk kishin arritur të realizonin një ekzekutim të ligjshëm. Shqetësimet e ngritura lidhen me vështirësitë për gjetjen e venave, dëmtimin e mundshëm të tyre gjatë injektimit, degradimin e pentobarbitalit dhe mungesën e trajtimit të duhur mjekësor në rast komplikacionesh.
Departamenti i Korrektimeve i Tenesit hodhi poshtë këto kritika dhe deklaroi se procedura kishte ndjekur të gjitha fazat e përcaktuara në protokollin shtetëror. Zëdhënësja Dorinda Carter tha se substanca e përdorur për injeksionin vdekjeprurës ishte testuar në mënyrë të përsëritur dhe kishte rezultuar efektive.
Pas ngjarjes, guvernatori i Tenesit Bill Lee bëri të ditur se të gjitha ekzekutimet e planifikuara për pjesën tjetër të vitit do të pezulloheshin. Ai kërkoi gjithashtu një hetim të plotë për të sqaruar shkaqet e incidentit.
Joel Zivot, mjek, profesor në Shkollën e Mjekësisë të Universitetit Emory dhe ekspert i angazhuar nga avokatët e Pike, i tha BBC-së se mund të mos ishte arritur niveli i nevojshëm i pentobarbitalit në gjakun e saj për të shkaktuar ndalimin e frymëmarrjes dhe kolapsin kardiovaskular. Sipas tij, vonesa në fillimin e ringjalljes mund të ketë krijuar edhe rrezik për dëmtim të trurit.
Procedura u zhvillua pasi Gjykata Supreme e SHBA-së anuloi një pezullim të përkohshëm që ishte vendosur më herët nga një gjykatë më e ulët. Kjo ishte hera e dytë brenda dy ditësh që gjyqtarët e Gjykatës Supreme autorizuan vijimin e një ekzekutimi.
Pike mori dënimin me vdekje në vitin 1996 për vrasjen e Colleen Schlemmer, 19 vjeç, krim i kryer në janar të vitit 1995, kur Pike ishte 18 vjeç.
Dëshmitë e paraqitura në gjyq treguan se Pike, i dashuri i saj 17-vjeçar në atë kohë dhe një mik e çuan Schlemmer, studente e Job Corps, në një zonë me pyje. Atje, sipas dëshmive, e torturuan dhe e vranë. Pike dhe i dashuri i saj e pranuan krimin, ndërsa një tjetër e pandehur dëshmoi në favor të prokurorisë.
Mbrojtja argumentoi se juria nuk kishte marrë në konsideratë siç duhej historinë e abuzimit seksual që Pike kishte përjetuar gjatë fëmijërisë. Avokatët kërkuan që dënimi kapital të shndërrohej në burgim të përjetshëm pa të drejtë lirimi me kusht.
Guvernatori Lee e hodhi poshtë kërkesën për mëshirë. Pike ishte e vetmja grua në radhën e të dënuarve me vdekje në Tenesi.
