Brukseli u përfshi të hënën në mbrëmje nga një tjetër incident me armë zjarri, pasi një person qëlloi me armë automatike pranë stacionit të trenit Bruxelles-Midi. Ngjarja ka alarmuar autoritetet belge, ndërsa kryeqyteti vijon të përballet me një seri episodesh të dhunshme të lidhura me trafikun e drogës.
Të lidhura
None found
Agjencia e lajmeve Belga raportoi se autori kishte një kallashnikov. Sipas kryebashkiakut të Saint-Gilles, Jean Spinet, të shtënat u kryen në një zonë ku ndodheshin edhe fëmijë.
“Një djalë hapi zjarr me një kallashnikov para fëmijëve. Ka vrima plumbash në tokë”, u shpreh Spinet për gazetarët.
Njerëzit që ndodheshin në një piceri pranë vendit të ngjarjes u detyruan të shtriheshin në dysheme për t’u mbrojtur. Sulmuesi u largua dhe ende nuk është arrestuar.
Rasti i së hënës shënon incidentin e tretë të njëpasnjëshëm në të njëjtën zonë. Të shtunën në mbrëmje, një person mbeti i plagosur nga të shtënat, ndërsa mëngjesin e së dielës një plumb përshkoi dritaren e një apartamenti.
Të martën, kryebashkiaku i Saint-Gilles përsëriti kërkesën për më shumë forca në terren.
“Dikush duhet të vijë dhe të na ndihmojë”, deklaroi ai.
Saint-Gilles prej vitesh është përballur me dhunë të lidhur me bandat e drogës, veçanërisht në hapësirat përreth stacionit të trenit Midi.
Në qershor 2024, një sulm me kallashnikovë në një kafene pranë stacionit Midi la të vrarë dy persona dhe të plagosur tre të tjerë. Edhe pse autoritetet kanë njoftuar shtimin e pranisë policore, problematika në zonë vazhdon.
“Kam kërkuar përforcime për tre vjet”, tha Spinet.
Zona policore Saint-Gilles dhe Midi disponon rreth 700 oficerë. Ndërkohë, bashkia e rriti vitin e kaluar me 1.8 milionë euro kontributin vjetor për forcat e sigurisë.
Të dhënat e publikuara nga gazeta Le Soir tregojnë se gjatë vitit 2026 në rajonin e Brukselit janë regjistruar të paktën 66 incidente me të shtëna armësh.
