Cila është grupmosha me më shumë probabilitet për t’u infektuar sërish?

Një studim i kryer në Danimarkë, zbuloi se njerëzit mbi 65 vjeç kanë vetëm 47% mbrojtje ndaj riinfektimit.

Autorët e hulumtimit, botuar në revistën mjekësore “Lancet”, thonë se kjo do të thotë se është jetike të merren masa për të mbrojtur njerëzit e moshuar, të cilët gjithashtu kanë më shumë të ngjarë të humbin jetën nga Covidi.

 

“Studimi ynë konfirmon atë që edhe shumë mjekë e theksojnë: Riinfektimi me Covidin është i rrallë te moshat e reja, te të rinjtë e shëndetshëm, por të moshuarit janë në rrezik për t’u infektuar përsëri”, u shpreh dr. Steen Ethelberg.

Nga hulumtimet e kryera, rezultoi se të rinjtë kanë rreth 80% mbrojtje ndaj një riinfektimi të mundshëm.

“Meqenëse njerëzit e moshuar gjithashtu kanë më shumë të ngjarë të përjetojnë simptoma të rënda të sëmundjes, gjetjet tona tregojnë qartë se sa e rëndësishme është të zbatohen politika për të mbrojtur të moshuarit gjatë pandemisë. Rezultatet theksojnë se sa e rëndësishme është që njerëzit t’u përmbahen masave të vendosura për të ruajtur veten dhe të tjerët, edhe nëse ata tashmë e kanë kaluar Covidin dhe nuk ndihen më aq të rrezikuar.”

Danimarka ka një program testimi shumë gjithëpërfshirës, me testet PCR të vëna në dispozicion për këdo që dëshiron një, pavarësisht nëse ata kanë simptoma. Më shumë se dy të tretat e popullsisë, 4 milionë njerëz, u testuan në vitin 2020.

Studiuesit panë përmasat e njerëzve që rezultuan pozitivë në valën e parë, midis marsit dhe majit dhe përsëri në valën e dytë, nga shtatori në dhjetor. Ata gjithashtu studiuan infeksionet e dyta në çdo kohë gjatë pandemisë në një grup prej 2.5 milionë njerëz.

Profesoresha Rosemary Boyton dhe dr. Daniel Altmann, nga Imperial College London, thonë në një koment në revistë se gjetjet janë kthjelluese sepse raportet e rasteve kanë sugjeruar më parë se riinfektimi është jashtëzakonisht i rrallë.

“Këto të dhëna janë të gjitha konfirmim, që për Sars-CoV-2 shpresa e imunitetit mbrojtës nga vetë infeksioni mund të mos jetë e mundur, prandaj një program global i vaksinimit me vaksina me efikasitet të lartë është zgjidhja e qëndrueshme”, shkruajnë ata.

Shtuar 19.03.2021 12:03