Qendrat Afrikane për Kontrollin dhe Parandalimin e Sëmundjeve (CDC Afrika) kanë dhënë alarmin për përhapjen e Ebolës në Republikën Demokratike të Kongos, me paralajmërimin se zhvillimet aktuale mund ta çojnë situatën drejt shpërthimit më të rëndë të njohur deri më sot.
Gjatë një takimi virtual të liderëve afrikanë në Burundi, Drejtori i Përgjithshëm i CDC Afrika, Jean Kaseya, bëri të ditur se dhjetëra mijëra njerëz që kanë pasur kontakte me të infektuarit ende nuk janë gjurmuar nga autoritetet shëndetësore.
Të lidhura
None found
“Nëse nuk e ndalojmë shumë shpejt këtë shpërthim, situata mund të jetë më e rëndë se ajo që përjetuam në Afrikën Perëndimore dhe në lindje të RD Kongos“, u shpreh Kaseya.
Me këtë deklaratë, ai iu referua epidemisë së Ebolës që preku Guinenë, Liberinë dhe Sierra Leonen në vitet 2014-2016, periudhë gjatë së cilës humbën jetën më shumë se 11 mijë persona.
Një shpërthim tjetër i përmasave të mëdha u regjistrua gjithashtu në vitin 2018 në lindje të Kongos.
Strukturat shëndetësore po hasin vështirësi serioze në identifikimin dhe mbikëqyrjen e personave që kanë qenë në kontakt me të sëmurët, çka po shton rrezikun për përhapje të mëtejshme të virusit.
Ekspertët po bëjnë thirrje për veprim të menjëhershëm dhe përkrahje ndërkombëtare, me synimin që situata të frenohet përpara se të shndërrohet në një krizë të re shëndetësore në kontinentin afrikan.
