Delegacioni iranian është larguar nga godina në Zvicër ku po zhvillonte bisedime me Shtetet e Bashkuara, të orientuara drejt përpjekjeve për t’i dhënë fund luftës në Lindjen e Mesme. Kjo ndodhi pasi Donald Trump kërcënoi me goditje ndaj republikës islamike për shkak të mbështetjes së saj për Hezbollahun.
Negociatat u ndikuan nga mospajtimet për çështjet kyçe të marrëveshjes, ndërsa paralelisht me takimet, Uashingtoni dhe Teherani shkëmbyen kërcënime, duke shtuar tensionin dhe rrezikun për përshkallëzim të ri ushtarak.
Të lidhura
None found
Sipas agjencisë shtetërore iraniane të lajmeve, IRNA, “Delegacioni i Republikës Islamike të Iranit, pas takimit me delegacionin e Katarit si një nga palët ndërmjetësuese, u largua nga ndërtesa ku po zhvilloheshin negociatat”.
E njëjta agjenci theksoi gjithashtu se, “Në të njëjtën kohë që filluan bisedimet në Zvicër, Donald Trump publikoi një mesazh në X në të cilin përsëriti kërcënimet dhe vërejtjet e tij kundër Iranit”.
Megjithatë, një diplomat i informuar për ecurinë e takimeve i tha AFP-së se pala iraniane nuk ishte tërhequr përfundimisht nga procesi negociues.
Më herët, Trump kishte paralajmëruar se do të godiste Iranin nëse ai nuk “i ndalonte menjëherë përfaqësuesit e tyre të paguar shumë në Liban që të shkaktonin probleme”.
Ndaj kësaj deklarate, Irani reagoi me një kundërparalajmërim.
Kryenegociatori iranian, Mohammad Bagher Ghalibaf, u shpreh: “Do të ishte më mirë që ata të ishin të kujdesshëm me deklaratat e tyre; forcat tona të armatosura janë të gatshme t’u përgjigjen atyre në një mënyrë të ndryshme. Pavarësisht se çfarë thonë, ne jemi ata që veprojmë”.
Sipas transmetuesit shtetëror të Iranit, gjatë “raundit të parë 80-minutësh të bisedimeve” të dielën nuk është trajtuar programi bërthamor. Raportohet se diskutimet janë përqendruar te zbatimi i memorandumit të mirëkuptimit mes Teheranit dhe Uashingtonit, si edhe te situata në Liban.
Nga ana tjetër, presidenti iranian Masoud Pezeshkian deklaroi se Teherani nuk do të heqë dorë nga e drejta për pasurimin e uraniumit, por mohoi se vendi ka synim të ndërtojë armë bërthamore.
“Mund të deklarojmë gjithashtu me shkrim se nuk kemi ndërmend të ndërtojmë një bombë”, tha ai.
