Policia spanjolle arrestoi sot një çift gjerman që jetonin të izoluar dhe i mbanin fëmijët e tyre në izolim për më shumë se tre vjet në Oviedo, në Spanjën veriperëndimore . Fëmijët, një 10-vjeçar dhe vëllezërit e tij binjakë, të dy tetë vjeç, nuk ndiqnin shkollën, ishin të lënë pas dore dhe jetonin në mjerim në atë që mediat spanjolle e quajtën “shtëpia e tmerreve”.
Policia u njoftua për situatën nga një fqinj i familjes më 14 prill. Kur policia shkoi në shtëpi, ata zbuluan se atje nuk jetonte vetëm një burrë, siç u tha në zyrën e gjendjes civile. Sipas fqinjëve, askush nuk u largua kurrë nga kjo shtëpi, e cila ishte marrë me qira në tetor 2021. Prindërit, një burrë gjerman dhe një grua gjermano-amerikane jetonin me tre femijët në banesë në kushte johigjienike.
“Ne të gjithë u prekëm nga sindroma Covid-19, sindroma e gjatë e Covid dhe gjithçka që pasoi. Ne mund ta hamendësojmë disi se çfarë mund ta ketë çuar një familje të qëndrojë e mbyllur në këtë mënyrë për kaq gjatë. Fakti që ata mbanin maska (kirurgjikale) mund të konsiderohet një anekdotë… ose jo,” shpjegoi inspektori i policisë Francisco Javier Lotano Garcia.
Sipas mediave spanjolle, të gjithë fëmijët mbanin pelena dhe nga tre maska kirurgjikale në fytyrë. Babai i familjes i kërkoi policisë të vishte maskë përpara se të hynte në shtëpi për hetim. Brenda, era e keqe ishte e papërshkrueshme. Qepenat ishin të gjitha të mbyllura. Kur dolën nga shtëpia, fëmijët prekën barin sikur të ishin magjepsur, sikur të mos kishin dalë kurrë jashtë më parë. Fëmijët u ekzaminuan nga një mjek dhe kujdesi i tyre i është besuar një qendre për mbrojtjen e fëmijëve.
