Andrew dhe Tristan Tate, dy influencues të njohur në rrjetet sociale, janë arrestuar në Miami nga Marshallët amerikanë, pas kërkesës së Mbretërisë së Bashkuar për ekstradimin e tyre në lidhje me një hetim për krime të rënda seksuale.
Të lidhura
None found
Departamenti i Drejtësisë i Shteteve të Bashkuara bëri të ditur se ndalimi i tyre është kryer në përputhje me procedurat dhe marrëveshjet ndërkombëtare të ekstradimit. Sipas autoriteteve, vëllezërit pritet të paraqiten në një gjykatë federale në Miami javën e ardhshme.
Shërbimi i Prokurorisë së Kurorës në Mbretërinë e Bashkuar thotë se akuzat lidhen me abuzime ndaj disa grave në zonën e Anglisë Lindore, të cilat dyshohet se janë kryer nga viti 2010 deri në vitin 2017.
Ndaj Andrew Tate janë ngritur 42 akuza, përfshirë përdhunim, trafikim qeniesh njerëzore, sulm dhe posedim të materialeve të pahijshme që përfshijnë të mitur. Tristan Tate, nga ana tjetër, përballet me 17 akuza penale, mes tyre përdhunim, sulm seksual dhe trafikim qeniesh njerëzore.
Mbrojtësi ligjor i tyre i ka kundërshtuar akuzat, duke insistuar se dy klientët e tij janë të pafajshëm. Ai ka pretenduar gjithashtu se Mbretëria e Bashkuar dhe Rumania kanë një marrëveshje, e cila sipas tij e pengon Londrën të kërkojë ekstradimin e tyre përpara përfundimit të proceseve gjyqësore ende në vijim në Rumani.
Vëllezërit Tate janë nën hetim prej kohësh edhe në Rumani, ku autoritetet i akuzojnë për trafikim të grave dhe shfrytëzim seksual në Rumani, Mbretërinë e Bashkuar dhe Shtetet e Bashkuara. Të dy kanë mohuar vazhdimisht çdo akuzë ndaj tyre.
Andrew Tate njihet si një prej personazheve më të diskutueshme të rrjeteve sociale, për shkak të deklaratave të tij mbi dominimin mashkullor dhe rolin e grave. Ai është pezulluar më herët nga disa prej platformave më të mëdha sociale për përmbajtjen e publikuar.
Autoritetet britanike kanë deklaruar se akuzat e reja janë shtuar pas denoncimeve të viktimave të tjera. Ndërkohë, katër gra në Mbretërinë e Bashkuar kanë ngritur edhe një padi civile ndaj Andrew Tate, duke e akuzuar për përdhunim.
Arrestimi në Shtetet e Bashkuara përbën zhvillimin më të fundit në vargun e hetimeve ndërkombëtare ndaj dy vëllezërve. Tashmë pritet që gjykata amerikane të shqyrtojë kërkesën e Mbretërisë së Bashkuar për ekstradimin e tyre.
