Pas javësh luftimesh të ashpra me Hamasin në Rripin verior të Gazës, ushtria izraelite sot përshkallëzoi operacionet e saj në pjesën jugore të enklavës palestineze, duke ngritur shqetësimin se një “skenar nga ferri” mund të shpaloset për civilët.
Chahal, i cili ka kryer operacione tokësore në brezin e vogël bregdetar të tokës palestineze që nga 27 tetori, njoftoi të dielën e kaluar se po zgjeronte operacionet në të gjithë Rripin e Gazës, me tanke që po vendoseshin pranë Khan Younis, një fokus i ri i luftimeve. Qyteti me më shumë se 200,000 banorë pësoi bombardime të forta gjatë natës.
Ushtria izraelite urdhëroi që me fillimin e operacionit tokësor, popullsia e Rripit verior të Gazës të largohej, të shkonte në pjesën jugore të enklavës. Tani ky seksion është i populluar edhe më dendur, pasi qindra mijëra njerëz të zhvendosur me forcë u strehuan atje.
Gjatë natës, dëshmitarët okularë raportuan bombardime dhe luftime të ashpra pranë Khan Younis, si dhe bastisje në drejtim të Rafah, në skajin jugor të enklavës. Agjencia zyrtare palestineze e lajmeve WAFA, nga ana e saj, foli për shumë të vdekur në qytetin e Gazës, më në veri.
Organizatat ndërkombëtare po japin alarmin për civilët në Gaza, ku “të gjitha shërbimet e telekomunikacionit” u pezulluan sepse “rrjeti më i madh i fibrave optike në anën izraelite” u dëmtua, tha organizata palestineze e telekomunikacionit PalTel.
“Po shkon drejt një skenari edhe më djallëzor ku operacionet humanitare nuk do të jenë në gjendje t’u përgjigjen nevojave”, paralajmëroi dje Lynn Hastings, kanadezja që ka marrë rolin e koordinatores humanitare të OKB-së për Territoret Palestineze.
