Gazetari Lutfi Dervishi ka rikthyer vëmendjen te bisedat e eksponentëve të krimit, prokurorëve, gjyqtarëve apo drejtuesve të policisë në aplikacionin SKY, të cilat për aq pak sa kanë dalë deri më tani duhej të shkaktonin një skandal të madh, gjë e cila nuk po ndodh pasi vëmendja e publikut po tërhiqet në ngjarje të tjera më pak të rendësishme.
Mirëpo, gazetari thotë se ka ende shpresë, pasi bisedat që janë transkriptuar nga SKY kanë kapur në “çark” personazhe të njohur, pastrimi i të cilëve nga skena politike dhe jeta publike e vendit do ta ndihmonte në instalimin e shtetit ligjor.
Madje, gazetari thekson se në biseda të sikletshme në SKY janë kapur edhe gazetarë apo klerikë.
“Mendo për një moment që ky është vetëm fillimi… zbardhja e komunikimeve në SKY do të na ofrojë surpriza të tjera nga politika, biznesi, media, gjyqësori dhe ndoshta edhe nga feja…
Mesa duket vetëm Sky (qielli) do të bëj të mundur dridhjen e (nën) tokës së krimit të veshur me uniformë e policit, të deputetit, apo edhe të gjyqtarit”, shkruan Dervishi, ndërsa shton se arrestimi i shefit të Forcave Operacionale tregon për nivelin e lartë të kriminalizimit të saj dhe faktin që peshku është qelbur nga koka.
Ai shton se është naive të mendosh që vetë Agjencia Mbikqyrjes Policore ka hetuar dhe ka zbuluar se forca operacionale po përdorte një linjë të pa autorizuar interneti.
“Denoncimi i bërë pak para ekzekutimit të operacionit “Metamorfoza” duket se ka lidhje me zbardhjen e komunikimeve të aplikacionit SKY EÇ”.
Pjesë nga postimi i Dervishit në Facebook:
SKY EÇ po i bën të duken qesharake ato që deri dje mendoheshin si skandale të mëdha, sic ishte gënjeshtra publike e ish drejtorit të përgjithshëm të policisë bashkë me prokurorin e Elbasanit që u gradua në SPAK, dy ditë para zgjedhjeve të 2021, në ngjarjen që i mori jetën një personi, plagosi tre të tjerë, frikësoi një dyzinë policësh dhe terrorizoi një qytet.
Mendo për një moment të mos ishte zbërthimi i aplikacionit SKY? Do të kishim ende vrasës që vrisnin për qerasje, invesitorë strategjikë që zbukurojnë Shqipërinë, oficerë policie që raportojnë te vrasësit dhe prokuror që bëhen copë për të liruar banditë.
Lajmi i denoncimit në Prokurori të Forcës Operacionale nuk po trajtohet si SKANDAL, por po kalon si lajm i aksidenteve rrugore, ndërkohë që bëhet fjalë për shembjen e besimit te struktura elitë e policisë së shtetit.
Dhe mendo për një moment që ky është vetëm fillimi… zbardhja e komunikimeve në SKY do të na ofrojë surpriza të tjera nga politika, biznesi, media, gjyqësori dhe ndoshta edhe nga feja…
Mesa duket vetëm Sky (qielli) do të bëj të mundur dridhjen e (nën) tokës së krimit të veshur me uniformë e policit, të deputetit, apo edhe të gjyqtarit.
“SKY” është kutia e Pandorës… Hapja e saj nxorri vrasjet me porosi, babëzinë, zilinë, makutërinë, vafërinë, dhimbjen, E vetmja gjë e fundit që ka mbetur është shpresa.
SKY është shpresa se së paku do të bëhet transparenca e llumit të mbledhur në vite në të gjitha pushtetet, përfshirë edhe pushtetin e medias.
