Nga Xhensila Kodra
Ulet numri i aksidenteve të ndodhura në muajin gusht, krahasuar me të njëjtën periudhë të një viti më parë. Muajin që lamë pas, ndodhën 182 aksidente në të gjithë vendin. 28 më pak se në gushtin e 2020-ës. Gjithsej ndërruan jetë 24 persona, 13 prej të cilëve këmbësorë. Ndërsa 141 të tjerë u plagosën.
18 prej të dëmtuarve morën lëndime të rënda dhe 123 të tjerë plagë më të lehta në trup. Aksidenti më i rëndë ishte ai i ndodhur më datë 26, në Qafë Muzinë, në aksin Gjirokastër-Sarandë. Një furgon u përplas me një mjet Land Rover dhe humbën jetën 5 persona që udhëtonin në furgon. 4 të tjerë u plagosën.
Për shkak edhe të sezonin turistik, rezultoi se fluksi i lëvizjeve gjatë muajit gusht ka qenë 2.5 herë më i lartë krahasuar me gushtin e vitit të shkuar. Nga shkeljet e konstatuara nga Policia Rrugore, numrin më të lartë e mbajnë ato të parakalimeve të gabuara, 9531 raste.
Pasohet nga shoferët e motorëve pa kaskë mbrojtëse dhe përdorimi i celularit në timon. Ndërsa 143 shoferë u arrestuan në gjendje të dehur dhe 11 të tjerë që lëviznin pa patentë.
AKSIDENTET NË GUSHT
182 aksidente
24 viktima (13 këmbësorë)
141 të plagosur (18 rendë dhe 123 lehtë)
SHKELJET NË GUSHT
344 shoferë të alkoolizuar
143 shoferë u arrestuan të dehur
11 shoferë të arrestuar pa patentë
1022 shoferë lëviznin me shpejtësi
2542 për përdorim celulari
9531 për parakalime të gabuara
2813 shoferë pa kaskë mbrojtëse
/abcnews.al/
