Anija me drithin ukrainas arrin në brigjet turke

Një delegacion inspektorësh nga një qendër e posaçme e përbashkët koordinimi u nis për të kontrolluar anijen e parë që transportonte grurë ukrainas, treguan pamjet në transmetuesin shtetëror turk TRT më 3 gusht.

Kjo po bëhet sipas një marrëveshjeje të ndërmjetësuar nga OKB-ja për të rifilluar eksportet e grurit nga vendi i shkatërruar nga lufta.

Anija transportuese, Razoni, që është e regjistruar në Sierra Leone ka arritur në brigjet turke paradinen e 3 gushtit. Ajo po transporton “mbi 26.000 tonë metrikë” misër.

Inspektimi i drithit do të bëhet nga një qendër e posaçme e përbashkët koordinimi, e përbërë nga zyrtarë civilë dhe ushtarakë nga Ukraina dhe Rusia, si dhe delegatë nga Turqia dhe OKB-ja.

Në përputhje me procedurën që palët kanë rënë dakord, inspektimet nuk do të bëhen në vetë portin e Stambollit, por në det, në grykëderdhjen e Bosforit.

Mediat janë paralajmëruar të qëndrojnë larg anijes.

Admirali turk, Ozcan Altunbulak, koordinator në qendrën e përbashkët, tha se “përgatitjet dhe planifikimi” po vazhdojnë për anijet e tjera që pritet të largohen nga portet e Ukrainës.

Një zyrtar i lartë turk i paidentifikuar i tha Reuters më herët më 2 gusht se Ankaraja pret që afërsisht një anije me drithë të largohet çdo ditë nga portet ukrainase për aq kohë sa ekziston marrëveshja e ndërmjetësuar nga OKB.

Sipas marrëveshjes së ndërmjetësuar nga Turqia dhe Kombet e Bashkuara, eksportet e grurit ukrainas nga tre porte të Detit të Zi do të rikthehen në nivelet e para luftës, prej rreth 5 milionë tonë në muaj.

Ukraina është një nga eksportuesit më të mëdhenj në botë të grurit, misrit dhe vajit të lulediellit, por pushtimi i vendit nga Rusia dhe bllokada e saj detare e porteve të Ukrainës kanë ndaluar dërgesat.