Ministrja e Arsimit, Evis Kushi, ka reaguar pas ngjarjes së rëndë ku një 13-vjeçar u vetëvar dhe ndërroi jetë.
“Ngjarja e Lushnjës ku një fëmijë 13-vjeçar u vetëvar duhet të alarmojë të gjithë shoqërinë, familjen, shkollat e çdo institucion. Secili duhet të marrë përgjegjësitë e veta”, u shpreh Kushi.
Kushi ka fajësuar orët e gjata e të pakontrolluara në internet të fëmijëve, si një nga shkaqet kryesore për të tilla ndodhi.
Edhe pse ngjarja është në hetim, deklaratat e shokëve kanë ngritur dyshimin se 13-vjeçari po përgatiste një video për tik-tok.
Ministrja tha se ka iniciuar një diskutim të gjerë për të marrë mendime se cilat janë rrugët e duhura për kontrollin e fëmijëve para rrezikut kibernetik.
Deklaratat ajo i bëri në Elbasan ku pati një takim me stafin akademik dhe studentët e Universitetit Aleksandër Xhuvani./albeu.com/
