Gjithësej 120 persona deri më tani janë evakuuar nga Ukraina, një pjesë e të cilëve janë shtetas ukrainas me familjet e tyre, njoftoi sot ministri i Punëve të Jashtme në Maqedoninë e Veriut, Bujar Osmani.
“Prej tyre, 20 e kanë shfrytëzuar apelin tonë që ta lëshojnë shtetin para 24 shkurtit, para fillimit të konfliktit. Në evakuim aktiv janë 43 qytetarë tanë, që do të thotë se i kanë lëshuar vendbanimet dhe janë rrugës për të dalë nga Ukraina, para një ore shtatë qytetarë e kanë lëshuar shtetin”, kumtoi Osmani.
Osmani njoftoi se ka qytetarë të cilët kanë lëshuar Ukrainën por janë vendosur në Poloni, ndërsa ka dhe qytetar të cilët nuk kanë asgjë në RMV përveç shtetësisë maqedonase.
“Javën e kaluar Ministria e Punëve të Jashtme dërgoi një mision diplomatik në Ukrainë për të lehtësuar evakuimin e qytetarëve të Maqedonisë. Rreth 38 qytetarë ende jetojnë në Ukrainë, 11 prej tyre në Kiev, shtatë në Zaporozhje dhe 20 në qytete të tjera”, tha Osmani.
Lidhur me largimin e sërishëm të ambasadorit maqedonas Krum Efremov në Ukrainë, ministri theksoi se disa ditë para evakuimit, ambasada ndodhej e fshehur për shkak të bombardimeve, që i detyroi ata të evakuohen nga Kievi në një vend më të sigurt në Ukrainë.
Ndryshe Osmani tha se jemi një nga vendet e pakta që e kemi kthyer ambasadën në Ukrainë, derisa të evakuohet edhe shtetasi i fundit prej andej.
