Valdete Daka: Presidenti të zgjidhet para krijimit të qeverisë së re

Valdete Daka, ish-gjyqtare e Gjykatës Supreme, ka vlerësuar në emisionin FIVE se pas certifikimit të rezultateve zgjedhore, hapi i parë duhet të jetë zgjedhja e presidentit të Kosovës, e vetëm më pas formimi i qeverisë së re.

Ajo argumentoi se vendi ndodhet në një situatë ku institucionet kryesore udhëhiqen nga ushtrues detyre, prandaj sipas saj është me rëndësi që fillimisht të zgjidhet një president me mandat të plotë kushtetues.

“E konsideroj që duhet të zgjidhet presidenti më përpara. Sidomos në situatën që jemi tani, meqenëse nuk kemi asnjë institucion me mandat legjitim, por ushtrues detyre”, deklaroi Daka.

Daka theksoi gjithashtu se zgjedhja e presidentit në këtë fazë do t’i jepte Kosovës një institucion funksional edhe nëse vendi do të shkonte sërish në zgjedhje.

Sipas saj, nëse në fillim formohet qeveria, atëherë procesi për zgjedhjen e presidentit mund të vonohet dhe të shoqërohet me kushtëzime politike.

“Në rast se zgjedhim qeverinë, me këtë konstelacion politik dhe këta numra që i kemi, me siguri do të kemi zvarritje për zgjedhjen e presidentit, por edhe kushtëzime nga ana e partisë që formon qeverinë”, u shpreh ajo.