Ish-deputeti i Partisë Demokratike të Kosovës, Xhavit Haliti, ka shprehur mendimin se subjekti i tij politik nuk duhet të refuzojë apriori një marrëveshje të mundshme me Lëvizjen Vetëvendosje, nëse kjo do t’i shërbente interesit kombëtar dhe zgjidhjes së ngërçit institucional.
Të lidhura
None found
Sipas tij, forcat politike janë të detyruara të jenë të hapura për bisedime dhe lëshime reciproke, pa ia mbyllur derën asnjë alternative që garanton qëndrueshmëri institucionale dhe vënie në punë të mekanizmave shtetërorë.
Kreu i PDK-së, Bedri Hamza, ka mbajtur një qëndrim krejt të kundërt. Pas takimit me kryeministrin në detyrë Albin Kurti, ai bëri të ditur se partia e tij do të vijojë të jetë në opozitë, duke sinjalizuar pa ekuivoke se për momentin nuk ka ndërmend të bëhet pjesë e një ekzekutivi të përbashkët me Lëvizjen Vetëvendosje.
Fjalët e Hamzës u lexuan si një riafirmim i kursit politik të PDK-së pas procesit zgjedhor, ndërkohë që pozicioni i Halitit nxiti debat mbi nevojën e një qasjeje më fleksibile nëse konteksti politik do të impononte një marrëveshje mes dy forcave më të mëdha parlamentare. Këto divergjenca të brendshme shfaqen pikërisht në një fazë kur peizazhi politik kosovar vijon të jetë i mbërthyer nga vështirësitë për krijimin dhe konsolidimin e institucioneve.
Krasniqi: Pohimi i z. Haliti dëshmon se në PDK nuk mbizotëron një pozicion krejtësisht uniform ndaj koalicionit me LVV-në
Profesori Kolë Krasniqi ka vlerësuar për “Bota sot” se deklarata e Xhavit Halitit i hap rrugën një diskutimi strategjik në gjirin e PDK-së lidhur me bashkëpunimin me Lëvizjen Vetëvendosje.
Ai thekson se Haliti nuk propozon thjesht një pakt afatshkurtër, por kërkon një dialog për një platformë të përbashkët qeverisjeje. Sipas Krasniqit, kjo provon se brenda radhëve të PDK-së nuk ekziston një pikëpamje tërësisht e njëtrajtshme për aleancën me LVV-në.
“Pohimi i Xhavit Halitit mund të konsiderohet si një nismë për të nxitur një reflektim strategjik në PDK, por jo si përmbysje e linjës zyrtare të partisë. Haliti nuk ka sugjeruar vetëm një marrëveshje kalimtare për postin e presidentit, por ka insistuar që alternativa e bashkëqeverisjes me LVV-në të analizohet në forumet e PDK-së dhe, në rast miratimi, të hartohet një program i përbashkët për katër vjet.
Deklarata e z. Haliti tregon se në PDK nuk mbizotëron detyrimisht një qëndrim plotësisht homogjen ndaj bashkëpunimit me Lëvizjen Vetëvendosje. Haliti e sheh LVV-në si rivale politike, por jo si një ent me të cilin marrëveshja duhet përjashtuar paraprakisht.
Njëkohësisht, deklarata e z. Haliti shërben edhe si mesazh për LVV-në: nëse ajo kërkon përkrahjen e PDK-së, atëherë nuk mund të mjaftohet vetëm me votat për presidentin, por duhet të ofrojë një pakt politik të plotë, të mbështetur në një program të përbashkët, me përgjegjësi të mirëpërcaktuara dhe një shpërndarje të qartë të pushtetit.
Megjithatë, një deklaratë e tillë, përderisa nuk është e sinkronizuar me udhëheqjen e partisë, mund të krijojë perceptimin e një konfuzioni strategjik ose të dobësimit të autoritetit të kreut të PDK-së.
Bedri Hamza, pas takimit me Albin Kurtin më 10 korrik, ka bërë të qartë se PDK-ja do të qëndrojë në opozitë gjatë këtij legjislature. Megjithatë, ai ka nënvizuar se PDK-ja nuk ka vija të kuqe absolute dhe se do t’i përkrahë në Kuvend marrëveshjet ndërkombëtare dhe çështjet me interes për Kosovën“, u shpreh ai për gazetën.
Më tej, Krasniqi vuri në dukje se mes qëndrimit të Bedri Hamzës dhe deklaratës së Xhavit Halitit ka një hendek të dukshëm, pasi i pari pasqyron pozicionin aktual të PDK-së, kurse i dyti ofron një opsion për t’u shqyrtuar.
Ai shton se PDK mund ta rishohë qëndrimin e saj vetëm në rast se shfaqen rrethana të reja ose një propozim konkret nga LVV-ja. Krasniqi nënvizon se çfarëdo marrëveshje duhet të ketë në themel interesin shtetëror dhe të përfshijë domosdoshmërisht çështje si institucionet, sundimi i ligjit dhe zhvillimi ekonomik.
“Prandaj, ndërmjet këtyre dy qëndrimeve ekziston një dallim i rëndësishëm. Nga njëra anë, Hamza ka paraqitur pozicionin aktual dhe zyrtar të PDK-së, pas bisedimeve konkrete me Kurtin. Nga ana tjetër, Haliti ka paraqitur një alternativë politike, e cila, sipas tij, duhet të shqyrtohet dhe të votohet në organet e partisë.
Këto qëndrime nuk janë krejtësisht të papajtueshme, sepse edhe Hamza më parë kishte deklaruar se PDK-ja ishte e hapur për një marrëveshje gjithëpërfshirëse. Mirëpo, pas takimit me Kurtin, ai ka konstatuar se nuk janë krijuar kushtet për një marrëveshje të tillë me LVV.
PDK-ja ka të drejtë dhe mundësi që ta rishqyrtojë pozicionin e saj, por ky rishqyrtim nuk duhet nënkuptuar automatikisht hyrjen në koalicion. Ndryshimi i qëndrimit do të ishte politikisht i arsyeshëm vetëm nëse paraqiten rrethana të reja ose një ofertë konkrete dhe serioze nga LVV-ja.
Një marrëveshje kompromisi në interes të vendit duhet të përfshijë konstituimin e Kuvendit, zgjedhjen e Qeverisë dhe të Presidentit/es si dhe zotimet konkrete për sundimin e ligjit, zhvillimin ekonomik dhe koordinimin e aktiviteteve strategjike me aleatët perëndimorë”.
Halili: Pohimi i Bedri Hamzës se PDK do të qëndrojë në opozitë tregon qartësinë e pozicionit aktual të partisë
Edhe profesori Nijazi Halili ka komentuar për “Bota sot” deklaratën e Xhavit Halitit lidhur me mundësinë e një marrëveshjeje politike mes PDK-së dhe Lëvizjes Vetëvendosje.
Halili u shpreh se një bashkëpunim i tillë duhet analizuar nën prizmin e interesit kombëtar dhe jo të përçarjeve historike. Sipas tij, një marrëveshje eventuale do të ishte kuptimplotë vetëm nëse do të mbështetej në një program të qartë, përgjegjësi konkrete dhe objektiva të përbashkëta.
“Deklarata e Xhavit Halitit se PDK nuk duhet ta përjashtojë mundësinë e një marrëveshjeje politike me Lëvizjen Vetëvendosje hap një debat të rëndësishëm për të ardhmen e skenës politike në Kosovë.
PDK duhet ta analizojë çdo mundësi në bazë të interesit të vendit dhe jo vetëm mbi ndarjet e së kaluarës. Një bashkëpunim eventual do të kishte kuptim vetëm nëse do të bazohej në një program të qartë, përgjegjësi konkrete dhe synime të përbashkëta për stabilitetin institucional“, tha ai.
“Megjithatë, deklarata e Bedri Hamzës se PDK do të mbetet në opozitë tregon se qëndrimi aktual i partisë është i qartë. Prandaj, çdo rishqyrtim i këtij pozicioni do të kërkonte një vlerësim të brendshëm politik dhe një marrëveshje që do të ishte në interes të qytetarëve.
Në politikë duhet të ekzistojë hapësirë për dialog, por çdo marrëveshje duhet të ndërtohet mbi parime dhe jo vetëm mbi kalkulime të momentit“, përfundoi ai për “Bota sot”.
