Qendra “Gjenocidi në Kosovë – Plagë e hapur” mirëpret qëndrimin e përbashkët të deputetëve për aktgjykimin e Hagës

Qendra “Gjenocidi në Kosovë – Plagë e hapur” ka vlerësuar konsensusin e 99 deputetëve të Kuvendit të Kosovës, të cilët miratuan deklaratën lidhur me aktgjykimin e Dhomave të Specializuara ndaj Hashim Thaçit, Jakup Krasniqit, Kadri Veselit dhe Rexhep Selimit.

Në reagimin e saj, qendra shprehet se deklarata e 28 shtatorit 2026 përfaqëson një qëndrim të qartë të deputetëve, të cilët nënvizuan se asnjë vendim gjyqësor nuk mund ta ndryshojë të vërtetën historike të luftës në Kosovë.

“E mirëpritëm faktin që, përmes deklaratës së 28 shtatorit 2026, deputetët mbajtën një qëndrim të prerë dhe theksuan se asnjë aktgjykim nuk mund ta zhbëjë të vërtetën historike të luftës në Kosovë. Përmes këtij qëndrimi, ata shprehën vullnetin e qytetarëve të Kosovës për ta cilësuar aktgjykimin e 16 shtatorit si të padrejtë, si dhe për ta kundërshtuar si të papranueshëm konkluzionin për ekzistencën e një qëllimi të përbashkët kriminal për realizimin e pavarësisë së Kosovës”, thuhet në reagim.

Qendra deklaron se beson fuqimisht që vetëm përmes unitetit mund të përmbushen kërkesat e deputetëve drejtuar institucioneve shtetërore të Republikës së Kosovës. Sipas saj, institucionet duhet të ndërmarrin çdo masë të nevojshme për ruajtjen e së vërtetës dhe të pastërtisë së luftës çlirimtare të popullit të Kosovës, si dhe për hartimin e një strategjie të përbashkët shtetërore.

Kjo strategji, sipas Qendrës, duhet të bashkërendojë veprimet juridike, institucionale dhe diplomatike, me synim mbrojtjen dhe afirmimin e së vërtetës së plotë historike për luftën e drejtë të Kosovës për liri dhe çlirim.

“Jemi të bindur se zbatimi profesional i kërkesave të sipërpërmendura do të çojë drejt një vendimi të drejtë: zhbërjes së Dhomave të Specializuara dhe lirimit të pengjeve që mbahen në burgun e Scheveningenit në Hagë”, thuhet në reagimin e Qendrës “Gjenocidi në Kosovë – Plagë e Hapur”.