Profesori Enver Bytyçi: Edi Rama po vepron si një diktator

Profesori Enver Bytyçi e ka krahasuar kryeministrin e Shqipërisë, Edi Rama, me ish-diktatorin Enver Hoxha, duke pretenduar se në librin “Albania Files” Rama ka pranuar dhe madje është krenuar me veprime që ai i konsideron të dëmshme për Shqipërinë, Kosovën dhe kombin shqiptar.

Në një reagim publik, Bytyçi ka drejtuar kritika edhe ndaj SPAK-ut, duke pretenduar se ky institucion nuk po funksionon më si mekanizëm i drejtësisë dhe se nuk po heton këto çështje.

Shkrimi i Bytyçit:

Në shkrimet e tij, diktatori shqiptar Enver Hoxha përmendte vazhdimisht dëshirat dhe urdhrat që kishte dhënë gjatë Luftës së Dytë Botërore, si edhe në periudhën e komunizmit, për eleminimin fizik të kundërshtarëve të tij politikë. Këto pasazhe në librat e tij paraqiteshin si mburrje për aktet kriminale që kishte kryer. Ai e pranonte hapur se likuidimi i kundërshtarëve politikë përbënte politikë thelbësore të qeverisjes dhe partisë së tij. Për këto deklarime, nëse do të ishte ende gjallë, ai mund të dënohej me burgim të përjetshëm. As dëshmitarë nuk do të duheshin. Ramiz Alia nuk e bëri këtë gafë!

Sot, sipas tij, është një diktator tjetër që ka nxjerrë me mburrje librin e krimeve të tij makabre kundër Shqipërisë. Edi Rama. Në librin “Albania Files”, i promovuar para disa muajsh, sipas tij paraqiten qartë të gjitha projektet anti-shqiptare të kryeministrit të Shqipërisë, të cilin arkitektët e shquar e pa moral të botës së sotme në Perendim e në Lindje e quanin “Mbret”! Madje, sipas tij, i kërkonin të shpallej president i përjetshëm, e pse jo edhe mbret.

Ndërsa diktatori Hoxha nuk jeton më për t’u përballur me burgun, ky diktatoruci i ditëve të sotme, sipas tij, vazhdon ende të mburret me krimet dhe tradhtitë e tij kundër Shqipërisë, Kosovës dhe kombit shqiptar. Kjo ndodh, sepse SPAK ka pushuar së qeni një instrument drejtësie.