Pozhari: Bisedimet VV-LDK për presidentin rrezikojnë të përfundojnë pa marrëveshje

Konsulenti politik Xhevdet Pozhari ka deklaruar se negociatat mes Lëvizjes Vetëvendosje dhe Lidhjes Demokratike të Kosovës për zgjedhjen e presidentit po shfaqin shenja të shumta që mund të çojnë drejt dështimit.

Duke folur në emisionin “Këndi i Debatit”, ai tha se të dyja partitë po ndjekin një qasje taktike, në mënyrë që, nëse marrëveshja dështon dhe vendi shkon në zgjedhje të reja, secila palë të mund të paraqesë argumentet e veta për përgjegjësinë e situatës.

Sipas Pozharit, nëse mes VV-së dhe LDK-së do të ekzistonte mirëbesim i plotë, deri tani do të duhej të ishin bërë të ditur emrat e mundshëm për postin e presidentit.

“Nga data 7 qershor kanë kaluar tre muaj dhe kjo çështje është e njohur prej kohësh. Nëse do të kishte besim mes palëve, mendoj se tashmë do të kishim dëgjuar emrat për presidentin. Shpesh politikanët flasin për atë që synojnë të arrijnë, e jo domosdoshmërisht për atë që është konkretisht në tryezë”, është shprehur ai.

Ai ka ngritur dyshime edhe për skenarin në të cilin një kandidat i propozuar mund të mos e pranojë nominimin.

“Kurti ka thënë se nuk bëhet fjalë për emra të konsultuar paraprakisht. Çfarë do të ndodhë nëse palët bien dakord për një emër, por ai person nuk e pranon? Për këtë arsye them se procesi i negociimit mbart shumë rrezik dështimi. Partitë po llogarisin edhe mundësinë e zgjedhjeve, në mënyrë që secila të ketë versionin e vet për arsyet e këtij përfundimi”, ka thënë Pozhari.

Ndërkohë, ai ka vlerësuar se përsëritja e zgjedhjeve nuk përbën një zgjidhje të mirë, nëse synimi është që të ndryshohet vullneti i qytetarëve.

Pozhari u ka bërë thirrje subjekteve politike të tregojnë më shumë vullnet për bashkëpunim dhe të mos e përdorin bllokimin si mënyrë të vazhdueshme veprimi.

“Pozicionet e PDK-së dhe Aleancës janë të njohura. LDK-ja ndodhet në një pozitë më të brishtë, pasi është dëmtuar nga procesi zgjedhor i 7 qershorit, por edhe nga ai i brendshëm, ndaj duhet të veprojë me shumë kujdes. Nuk është e dobishme të nxiten vazhdimisht zgjedhje me shpresën se do të ndryshojë vullneti i qytetarëve, pasi dihet se kush i ka fituar zgjedhjet për herë të tretë radhazi. Partitë duhet të bashkëpunojnë dhe të mos kërkojnë gjithmonë arsye për të bllokuar proceset”, ka deklaruar ai.

Sipas tij, kriza politike nuk lidhet me Kushtetutën, por me mungesën e marrëveshjes mes partive.

“Kushtetuta nuk është e sëmurë; problemi është se politikanët janë prekur nga virusi i mosmarrëveshjeve, mospajtimeve dhe ndarjeve të thella”, ka përfunduar Pozhari.

Vlerësimet e tij pasuan takimin e së mërkurës mes liderit të Lëvizjes Vetëvendosje në pushtet, Albin Kurti, dhe kryetarit të Lidhjes Demokratike të Kosovës në opozitë, Lumir Abdixhiku. Takimi u zhvillua me synimin për të arritur një marrëveshje rreth zgjedhjes së presidentit të ri të Kosovës dhe për t’i dhënë fund krizës institucionale pothuajse dyvjeçare.

Pas bisedimeve, të cilat zgjatën pothuajse tre orë në Prishtinë, Kurti dhe Abdixhiku konfirmuan se kishin diskutuar për “emra konkretë” për presidentin e ardhshëm, por nuk i bënë publike identitetet e tyre, duke iu referuar ndjeshmërisë së procesit.

“Bisedimet do të vijojnë, pasi mirëbesimi është shtuar dhe për herë të parë kemi diskutuar me dhe për emra të veçantë”, deklaroi Kurti pas takimit.

Abdixhiku tha se emrat e diskutuar me kryetarin e Vetëvendosjes janë në përputhje me “parimet e dakorduara deri më tani”.

Ai theksoi se, për shkak të ndjeshmërisë së negociatave, në këtë fazë nuk mund të tregojë se cilët janë kandidatët konkretë, por shtoi: “Do të takohemi sërish për ta përmbyllur procesin dhe për të zgjedhur presidentin e ardhshëm të Kosovës”.

Një marrëveshje e mundshme mes VV-së dhe LDK-së, e cila ka fituar 18 vende, do të siguronte të paktën 81 vota. Ky numër do të ishte i mjaftueshëm për zgjedhjen e presidentit të ri, nëse të paktën 80 deputetë do të ishin të pranishëm në sallë.