Protesta e Organizatës së Veteranëve të Luftës së UÇK-së, e planifikuar për sot në orën 12:00 në sheshet e Prishtinës, do të zhvillohet nën masat e përgatitura nga Policia e Kosovës.
Të lidhura
None found
PK-ja ka deklaruar se angazhimi i saj do të përqendrohet në ruajtjen e rendit dhe qetësisë publike, si dhe në garantimin e sigurisë së pjesëmarrësve. Institucioni policor theksoi se respekton të drejtën e qytetarëve për të protestuar në mënyrë paqësore dhe demokratike, në pajtim me ligjin.
Për koordinimin e veprimeve dhe sigurimin e mbarëvajtjes së tubimit, zyrtarët policorë janë takuar me përfaqësues të Organizatës së Veteranëve të Luftës.
Policia u ka kërkuar protestuesve t’i zbatojnë ligjet dhe udhëzimet e zyrtarëve, ndërsa gjatë tubimit të tregojnë kujdes dhe përmbajtje. Gjithashtu, pjesëmarrësit janë porositur të mos hedhin gjësende ose mjete të forta dhe të mos mbajnë maska.
Lëvizja e protestuesve drejt shesheve të kryeqytetit mund të sjellë kufizime apo ndërprerje të përkohshme të trafikut në disa rrugë. Në rast nevoje, njësitë policore të trafikut do ta drejtojnë qarkullimin përmes rrugëve alternative.
