Kryetari i Prishtinës, Përparim Rama, po e lë gjithnjë e më të hapur mundësinë që të garojë për drejtimin e Lidhjes Demokratike të Kosovës.
Të lidhura
None found
Gjatë një paraqitjeje televizive të hënën, ai deklaroi se ka kontribuar në vazhdimësi për partinë dhe se synon të vazhdojë ta ndihmojë atë të dalë nga gjendja ku ndodhet.
Rama theksoi se përkrahja e tij për LDK-në ka qenë e vazhdueshme, duke përmendur edhe faktin se pas 12 vitesh kjo parti doli e para në kryeqytet. Ai shtoi se ka qenë, është dhe do të jetë pranë LDK-së.
Megjithatë, kryetari i Prishtinës ende nuk e ka marrë vendimin përfundimtar nëse do të kandidojë në zgjedhjet e brendshme të partisë. I pyetur për këtë mundësi, ai tha: “Ende nuk e kam marr vendimin, por besoj që po”.
Të njëjtën çështje Rama e kishte komentuar edhe më herët, ndërsa ditën e sotme, kur u pyet se si është pritur nga partia kandidatura e tij e mundshme për kryetar të LDK-së, ai iu referua procesit demokratik të zgjedhjeve brenda subjektit.
“Këtu e di që kemi demokraci, a po. Zgjedhje demokratike”, deklaroi ai.
Rama bëri të ditur se mundësia e kandidimit ishte diskutuar me strukturat e partisë që në janar.
Analisti Lirim Gashi vlerëson se ambicia e Përparim Ramës nuk duhet trajtuar si një deklaratë e zakonshme mediatike. Sipas tij, bëhet fjalë për një synim politik që po merr formë dhe që mund të shndërrohet në një mundësi për ndryshim brenda LDK-së.
Gashi thotë se Rama e ka bërë të qartë se beson se do të kandidojë, edhe pse ende nuk e ka konfirmuar zyrtarisht vendimin. Po ashtu, ai ka treguar se gatishmërinë për ta drejtuar partinë ua ka shprehur Lumir Abdixhikut, Lutfi Hazirit dhe Avdullah Hotit.
Sipas analistit, kjo tregon se ambicia e Ramës nuk është krijuar së fundmi, por është pjesë e një diskutimi që lidhet me të ardhmen e LDK-së. Megjithatë, Gashi bën dallim mes seriozitetit të një ambicieje dhe mundësisë për ta realizuar atë.
“Të synosh postin e kryetarit të LDK-së është një gjë, ndërsa të kesh vizionin, ekipin, legjitimitetin dhe guximin për ta reformuar partinë është diçka krejt tjetër”, shprehet ai për “Bota sot”.
Gashi beson se kandidimi i Ramës mund të sjellë një alternativë të re, veçanërisht nëse ai arrin të distancohet nga logjika e klaneve dhe të prezantojë një ofertë politike që nuk kufizohet nga interesat individuale.
Megjithatë, analisti nënvizon se LDK-ja nuk ka nevojë vetëm për një figurë të re në krye. Sipas tij, sfida kryesore është rikthimi i identitetit politik të partisë.
Rama, sipas Gashit, mund të jetë pjesë e zgjidhjes vetëm nëse kandidaturën e tij e ndërton mbi një projekt reformues dhe jo mbi synimin për të zëvendësuar një emër me një tjetër.
“Ndryshimi i kapitenit nuk e shpëton vetvetiu anijen nëse problemi mbetet te busulla, te ekuipazhi dhe te destinacioni”, thekson Gashi.
Ai paralajmëron se LDK-ja mund të përfundojë duke ndryshuar vetëm figurën në krye, pa prekur mënyrën se si funksionon dhe ushtron politikën.
Rikthimi i LDK-së si forcë e parë në Prishtinë pas 12 vjetësh është, sipas Gashit, një rezultat që duhet analizuar me kujdes. Por ai thekson se fitorja në kryeqytet nuk është e barabartë me bindjen e elektoratit në të gjithë Kosovën.
“Rezultati në Prishtinë është një argument politik me peshë, por nuk mund të konsiderohet çek i bardhë për drejtimin e partisë në nivel qendror”, thotë ai.
Analisti e konsideron kryeqytetin një hapësirë të rëndësishme elektorale dhe një dëshmi të aftësisë për të fituar besimin e qytetarëve. Megjithatë, sipas tij, rezultati nuk mund t’i atribuohet vetëm një personi, pasi në të ndikojnë kandidati, organizimi partiak, puna në terren, rrethanat politike dhe votuesit.
Gashi nënvizon se Prishtina ka specifikat, elektoratin dhe pritshmëritë e veta. Për këtë arsye, një kandidat për drejtimin e LDK-së duhet të dëshmojë se mund të krijojë besim edhe në komunat e tjera, se i kupton dallimet sociale dhe ekonomike të vendit dhe se mund ta kthejë suksesin lokal në një ofertë të besueshme kombëtare.
Ai e sheh rezultatin e Ramës në Prishtinë si kapital të rëndësishëm politik, por jo si një certifikatë që i jep automatikisht të drejtën për të udhëhequr LDK-në.
“Rama duhet ta ketë mundësinë të dëgjohet, ta prezantojë programin dhe të përballet me kandidatët e tjerë. Por posti nuk mund t’i rezervohet paraprakisht vetëm për shkak të një fitoreje lokale”, shprehet Gashi.
Sipas tij, demokracia partiake kërkon garë, debat dhe votë të lirë. Fitorja e një beteje lokale nuk do të thotë se kandidati e ka fituar automatikisht edhe garën politike në nivel kombëtar.
Gashi thekson se drejtimi i një komune kërkon një program urban, shërbime më të mira dhe menaxhim efikas, ndërsa drejtimi i një partie kombëtare kërkon përgjigje për ekonominë, arsimin, shëndetësinë, drejtësinë, politikën e jashtme dhe të ardhmen e shtetit.
Për këtë arsye, suksesi i Ramës në Prishtinë duhet marrë në konsideratë, por nuk duhet trajtuar si garanci për marrjen e drejtimit të LDK-së.
I pyetur nëse kandidimi i mundshëm i Ramës do të sillte një frymë të re dhe do ta rikthente besimin e elektoratit, Gashi tha se partia nuk ka nevojë vetëm për ndryshim gjenerate, por për një ndryshim të kulturës politike.
“Fryma e re që mund të sjellë Përparim Rama nuk do të varet vetëm nga emri i tij, por nga mënyra se si do ta përdorte mundësinë për ta drejtuar partinë”, deklaron analisti.
Ai argumenton se ndërrimi i kryetarëve, nënkryetarëve dhe zëdhënësve nuk mjafton, nëse mbeten të pandryshuara mënyra e marrjes së vendimeve, trajtimi i kundërshtarëve të brendshëm dhe përzgjedhja e njerëzve për përgjegjësi publike.
Nëse Rama dëshiron të shihet si simbol i një fillimi të ri, duhet të paraqesë një plan të qartë reformash. Kjo, sipas Gashit, nënkupton hapjen e partisë ndaj profesionistëve dhe brezave të rinj, përzgjedhjen e kandidatëve mbi bazën e meritës, demokraci reale në strukturat partiake dhe largim nga ideja se besnikëria ndaj udhëheqjes vlen më shumë se aftësia.
Një çështje tjetër e rëndësishme është përcaktimi i identitetit politik të LDK-së. Partia duhet t’u tregojë qytetarëve se çfarë alternative përfaqëson, cilat probleme synon të zgjidhë dhe ku dallon konkretisht nga subjektet e tjera.
“LDK-ja nuk mund të mbështetet pafundësisht te kujtimet e së kaluarës, pavarësisht rëndësisë së historisë së saj. Historia mund të shërbejë si themel, por nuk mund të zëvendësojë një program qeverisës”, shprehet Gashi.
Sipas tij, sfida e Ramës është të mos paraqitet vetëm si kandidati që kërkon largimin e një kryetari, por si një kandidat që e di se çfarë dëshiron të ndërtojë pas tij.
Gashi vlerëson se LDK-ja duhet të zhvillojë një diskutim të hapur për përgjegjësitë e saj politike, gabimet e së kaluarës dhe arsyet pse një pjesë e elektoratit është larguar ose nuk e konsideron më partinë si alternativën e parë.
Pa një reflektim të tillë, paralajmëron ai, thirrjet për unitet mund të mbeten vetëm deklarata formale, ku kërkohet ndryshimi i gjithçkaje, por pa prekur interesat ekzistuese.
“Rama mund të jetë një mundësi për ndryshim, por kjo mundësi nuk duhet ngatërruar me garancinë. Ai duhet të vlerësohet për programin, ekipin dhe aftësinë për të reformuar institucionet e partisë”, thekson analisti.
Gashi shton se LDK-ja nuk ka nevojë për një shpëtimtar që premton ta nxjerrë nga kriza. Ajo ka nevojë për një lidership që ndërton mekanizma, në mënyrë që partia të mos varet më nga pritja e një figure shpëtimtare.
Në fund, analisti foli edhe për mundësinë që kandidimi i Ramës të shkaktojë përplasje brenda LDK-së.
Sipas tij, konkurrenca mes dy ose më shumë kandidatëve nuk përbën domosdoshmërisht rrezikun kryesor. Problemi do të lindte nëse fituesi do ta trajtonte partinë si pronë personale, ndërsa humbësit do ta përdornin rezultatin si arsye për t’u larguar, për ta sabotuar udhëheqjen e re ose për të pritur një mundësi hakmarrjeje.
Gashi e konsideron reale mundësinë e tensioneve, pasi çdo garë për drejtimin e një partie në krizë prek jo vetëm programin, por edhe raportet e brendshme të pushtetit. Megjithatë, ai thekson se konkurrenca nuk duhet cilësuar automatikisht si konflikt.
“Përplasja e ideve është pjesë e demokracisë. Problemi shfaqet kur gara shndërrohet në përpjekje për eliminimin e kundërshtarit”, thotë ai.
Nëse Rama vendos të kandidojë, do të përballet me pyetje për ekipin që do të sjellë, mënyrën se si do ta trajtojë strukturën ekzistuese, gabimet që synon të korrigjojë dhe mënyrën se si do ta ruajë vazhdimësinë institucionale të LDK-së pa e lënë partinë peng të së kaluarës.
Edhe kundërshtarët e mundshëm, sipas Gashit, duhet ta kuptojnë se një parti demokratike nuk mund të kërkojë besimin e qytetarëve nëse e sheh konkurrencën e brendshme si kërcënim. Nëse një kandidaturë e re konsiderohet si e papranueshme, atëherë problemi lidhet edhe me mënyrën se si konceptohet demokracia brenda partisë.
Një garë e menaxhuar mirë mund ta forcojë LDK-në, ta mobilizojë anëtarësinë dhe ta rikthejë vëmendjen e publikut. Në të kundërt, një përplasje e pakontrolluar mund ta dobësojë edhe më shumë partinë dhe ta bindë elektoratin se ajo merret më shumë me postet e veta sesa me problemet e qytetarëve.
Gashi vlerëson se Përparim Rama duhet ta ketë mundësinë të garojë, nëse e formalizon kandidaturën, ndërsa LDK-ja duhet ta gjykojë mbi bazën e meritës. Megjithatë, përgjegjësia për të ardhmen e subjektit nuk mund t’i lihet vetëm një personi.
“LDK-ja nuk do të shpëtojë vetëm duke ndërruar kryetarin. Rikthimi i saj do të nisë kur të ndryshojë mënyrën se si e zgjedh kryetarin, si i trajton njerëzit e vet dhe si u përgjigjet qytetarëve”, përfundon Gashi.
