Policia e Kosovës ka filluar të marrë përgjegjësinë për sigurinë në urën kryesore mbi lumin Ibër në Mitrovicë. Në të njëjtën kohë, asaj po i delegohen detyra të reja edhe në hapësirën përreth Manastirit të Deçanit.
Të lidhura
None found
Ky proces është pjesë e ndryshimit gradual të pranisë së përhershme të KFOR-it dhe e përfshirjes më të madhe të Policisë së Kosovës në strukturat e sigurisë. Zhvillimi po konsiderohet i rëndësishëm për forcimin e institucioneve vendore.
Avokati Gazmend Halilaj, në një prononcim për “Bota sot”, foli për rëndësinë politike dhe institucionale të këtij hapi, mesazhin që ai i përcjell Beogradit dhe pasojat e mundshme në debatin politik të brendshëm në Kosovë.
Halilaj tha se transferimi i përgjegjësive te institucionet kosovare nuk përbën dobësim të sigurisë apo të rolit ndërkombëtar, por tregon se institucionet e Republikës së Kosovës po rrisin kapacitetet dhe po marrin më shumë përgjegjësi.
Ai e cilësoi vendimin e KFOR-it për kalimin gradual nga prania e përhershme në urën kryesore mbi lumin Ibër si një zhvillim me rëndësi të veçantë, i cili lidhet me përmirësimin e gjendjes së sigurisë.
Sipas tij, ky hap dëshmon se institucionet dhe strukturat e sigurisë së Republikës së Kosovës janë duke u konsoliduar dhe po aftësohen për të garantuar rendin dhe sigurinë në territorin e vendit.
Halilaj theksoi se prania e KFOR-it vazhdon të jetë thelbësore për stabilitetin e Kosovës dhe të rajonit. Megjithatë, ai shtoi se në një shtet demokratik synimi duhet të jetë funksionimi efektiv i institucioneve vendore dhe ushtrimi prej tyre i përgjegjësive përkatëse.
Për këtë arsye, kalimi nga një prani e përhershme e KFOR-it në një rol më fleksibil, sipas tij, duhet kuptuar si shenjë e stabilitetit më të madh dhe e fuqizimit të kapaciteteve vendore, e jo si rrezikim i sigurisë.
Një vlerësim të veçantë ai i bëri edhe përfshirjes graduale të Policisë së Kosovës në arkitekturën e sigurisë së KFOR-it në Manastirin e Deçanit.
Gazmend Halilaj.
Avokati tha se ky proces tregon rritjen e rolit dhe të besimit ndaj Policisë së Kosovës, sidomos në zona ku çështjet e sigurisë kanë qenë shpesh të lidhura me tensione politike dhe etnike.
Sipas Halilajt, integrimi i Policisë së Kosovës në këtë strukturë sigurie dëshmon se ajo po shihet gjithnjë e më shumë si një institucion profesional dhe i rëndësishëm i sigurisë në Republikën e Kosovës.
Ai vlerësoi se kjo merr rëndësi të posaçme në hapësira ku siguria është përdorur shpesh si mjet për nxitjen e tensioneve politike dhe etnike.
Halilaj u shpreh se zhvillimet në fjalë i dërgojnë Beogradit një mesazh të qartë: përgjegjësia për sigurinë në Kosovë u takon institucioneve të Republikës së Kosovës.
Ai nënvizoi se forcimi i këtyre institucioneve nuk duhet interpretuar si veprim kundër një komuniteti të caktuar, por si konsolidim i rendit kushtetues dhe institucional të vendit.
Po ashtu, ai tha se edhe faktorët politikë në Kosovë që kundërshtojnë ose e minimizojnë fuqizimin e institucioneve shtetërore duhet ta shohin këtë zhvillim si dëshmi se ndërtimi i strukturave funksionale dhe profesionale është në të mirë të të gjithë qytetarëve, pa dallim përkatësie etnike apo politike.
Duke folur për dimensionin politik, avokati tha se Qeveria e Kosovës mund ta konsiderojë marrjen e këtyre përgjegjësive si një arritje politike, pasi forcimi i institucioneve të sigurisë dhe rritja e besimit në kapacitetet vendore janë zhvillime pozitive për shtetin.
Megjithatë, ai theksoi se një proces institucional i kësaj natyre nuk duhet t’i atribuohet vetëm një qeverie apo një partie politike.
Sipas tij, siguria e Republikës së Kosovës përbën interes shtetëror, ndërsa përparimet në këtë drejtim duhet të konsiderohen si rezultat i institucioneve të Kosovës në tërësi.
Halilaj i bëri thirrje edhe opozitës që ta trajtojë këtë çështje me përgjegjësi shtetërore. Ai tha se kritikat ndaj Qeverisë mund të vazhdojnë për çështje të ndryshme, por ato nuk duhet të shndërrohen në kundërshtim ndaj proceseve që forcojnë Policinë e Kosovës, përmirësojnë sigurinë dhe rrisin përgjegjësinë e institucioneve të Republikës.
Ai shtoi se interesat e shtetit duhet të qëndrojnë mbi interesat partiake, pasi qeveritë ndryshojnë dhe partitë politike vijnë e largohen, ndërsa institucionet shtetërore mbeten.
“Bota sot” e përmbylli bashkëbisedimin me Gazmend Halilajn, i cili e cilësoi këtë si një rast ku interesi shtetëror duhet të jetë mbi atë partiak.
