Arritja e një dakordësie ndërmjet Lëvizjes Vetëvendosje dhe Lidhjes Demokratike të Kosovës konsiderohet thelbësore për tejkalimin e ngërçit institucional në vend.
Të lidhura
None found
Pas takimit të fundit me kryetarin e Vetëvendosjes, Albin Kurti, dhe kryetarin e LDK-së, Lumir Abdixhiku, ushtruesja e detyrës së presidentes, Albulena Haxhiu, shprehu shpresën se palët do të gjejnë zgjidhje në një kohë sa më të shkurtër.
“Shpresoj dhe uroj që kjo marrëveshje të përmbyllet sa më parë, sepse është tejet e rëndësishme që të vazhdojmë përpara. Le të shpresojmë që java e ardhshme të jetë vendimtare për këtë proces të rëndësishëm”, deklaroi Haxhiu.
Megjithatë, analistët e marrë në intervistë shfaqen skeptikë për mundësinë që kandidati për kreun e shtetit të marrë mbështetjen e nevojshme në Kuvend.
Analisti politik Sadik Zeqiri tha për RTK se në radhët e LDK-së mund të ketë deputetë që nuk do ta votojnë kandidatin e propozuar nga Vetëvendosje. Në vlerësimin e tij, koha mund të luajë një rol përcaktues.
Ndërsa analisti Ejup Gojnovci e konsideron shqetësues ndryshimin e vazhdueshëm të emrave të përmendur për postin e presidentit nga një takim në tjetrin.
Sipas Gojnovcit, edhe një marrëveshje e mundshme mes dy partive për parimet dhe kandidatin nuk garanton se Kosova do të zgjedhë menjëherë presidentin e ri.
“Lidhja Demokratike e Kosovës nuk mund të flasë apo të japë garanci për të gjithë numrat dhe votat e deputetëve të saj në Kuvend. Për këtë arsye, mendoj se momenti kritik do të jetë ai kur do të kuptohet nëse do të kemi president apo jo. Kjo do të ndodhë kur emri i kandidatit të hidhet në votim”, u shpreh ai.
Gjatë javës së ardhshme pritet të kuptohet nëse negociatat ndërmjet Vetëvendosjes dhe LDK-së do të përfundojnë me një marrëveshje konkrete dhe nëse ajo do të mundësojë sigurimin e votave të nevojshme për zgjedhjen e presidentit të ri.
