Ministri i Mbrojtjes, Ejup Maqedonci, zhvilloi një takim me ambasadorin e Gjermanisë në Kosovë, Rainer Rudolph, ku u trajtuan çështje që lidhen me sigurinë në Kosovë dhe në rajon, si dhe zhvillimet në sektorin e mbrojtjes.
Të lidhura
None found
Një pjesë e rëndësishme e bisedës iu kushtua avancimit të Forcës së Sigurisë së Kosovës (FSK) dhe bashkëpunimit dypalësh mes Kosovës e Gjermanisë, me theks të veçantë te trajnimet dhe stërvitjet e përbashkëta.
Palët shqyrtuan gjithashtu mundësinë e zgjerimit të bashkëpunimit në industrinë e mbrojtjes dhe në proceset e prokurimeve ushtarake.
Ministria e Mbrojtjes bëri të ditur se këto marrëdhënie synojnë forcimin e kapaciteteve të FSK-së dhe përmirësimin e ndërveprueshmërisë së saj me partnerët ndërkombëtarë.
Sipas ministrisë, këto angazhime i shërbejnë synimit të Kosovës për të rritur kontributin në ruajtjen e paqes, sigurisë dhe stabilitetit në rajon e më gjerë.
Gjermania u vlerësua si një partner i rëndësishëm dhe i besueshëm i Kosovës në ndërtimin e një force moderne, profesionale dhe të aftë për të dhënë kontribut në sigurinë kolektive.
