LVV i përgjigjet nismës së PDK-së për ndryshimin e ligjit të Speciales

Lëvizja Vetëvendosje ka reaguar ndaj nismës së PDK-së për Projektligjin e Gjykatës Speciale në Kuvend, duke kërkuar që çështja të trajtohet me kujdes të shtuar juridik dhe institucional.

LVV thekson se fillimisht duhet pritur vendimi i Gjykatës Kushtetuese për konstituimin e Kuvendit, pasi kërkesa e dorëzuar në këtë gjykatë ende nuk është tërhequr. Sipas saj, vetëm pas këtij vendimi mund të vlerësohen pasojat juridike që mund të rrjedhin prej tij.

Sa i përket propozimit për ndryshimin dhe plotësimin e ligjit, Lëvizja Vetëvendosje deklaron se do ta analizojë atë në mënyrë të hollësishme, duke shqyrtuar përputhjen me legjislacionin në fuqi dhe ndikimin që një ndërhyrje e tillë mund të ketë në këtë fazë të procedurave pranë Dhomave të Specializuara.

Partia vlerëson se duhet të merret parasysh edhe fakti që proceset ndaj katër ish-krerëve të UÇK-së po zhvillohen nga ekipe të ndryshme të mbrojtjes. Për këtë arsye, çdo nismë duhet të analizohet edhe në lidhje me interesat dhe strategjitë juridike të secilit rast veçmas.

LVV konsideron se tani është e nevojshme të krijohet një qëndrim i përbashkët institucional dhe shtetëror, i bazuar në një shqyrtim të plotë juridik.

Sipas saj, çdo hap duhet të ndërmerret vetëm pasi të jenë analizuar me kujdes pasojat e mundshme ligjore, veçanërisht ato që lidhen me procedurën e shkallës së dytë, pra me procesin e apelit.

Synimi, përfundon LVV, duhet të jetë që veprimet e institucioneve të jenë të mirëmenduara e të koordinuara dhe të mos sjellin pasoja të padëshiruara për proceset gjyqësore që janë ende në zhvillim.