Deputeti i Lëvizjes Vetëvendosje, Nezir Kraki, deklaroi të dielën në emisionin “Review”, të drejtuar nga Greta Topjana në Euronews Albania, se kryeministri Albin Kurti ka arritur një marrëveshje me drejtuesit e LDK-së për një kandidaturë të përbashkët për presidentin e Kosovës.
Sipas Krakit, emri për të cilin është rënë dakord është Bekim Sejdiu. Ai i kërkoi LDK-së të vijojë qasjen konstruktive dhe të tregojë se mbështet funksionimin normal të institucioneve.
Të lidhura
None found
Kraki tha se pret që LDK-ja të reflektojë gjatë ditëve në vijim, të rikthejë unitetin e brendshëm dhe të konkretizojë qëndrimin e saj në procesin e zgjedhjes së presidentit.
“Marrëveshja mes lidershipit të LDK-së dhe atij të Lëvizjes Vetëvendosje, përfshirë zotin Kurti, lidhet me emrin e Bekim Sejdiut, i cili konsiderohet kandidat konsensual. Nga pikëpamja matematikore, 18 deputetët e LDK-së dhe 62 deputetët tanë bëjnë 80, duke përmbushur edhe kushtin e kuorumit të dyfishtë në Kosovë”, u shpreh ai.
Deputeti shtoi se 80 deputetët duhet të jenë të pranishëm në sallë dhe të marrin pjesë drejtpërdrejt në votim, duke u ngritur nga vendet e tyre dhe duke depozituar votën në kuti.
“Kushtet ekzistojnë. U bëj thirrje kolegëve të LDK-së që konstruktivitetin e treguar gjatë javëve të fundit ta çojnë deri në fund dhe ta dëshmojnë së bashku se kjo parti ka vërtet ndjeshmëri institucionaliste. Funksionimi i rregullt i sistemit duhet të jetë mbi partitë politike dhe mbi çdo situatë politike që mund të krijohet”, deklaroi Kraki.
