Lutfi Haziri reagon pas identifikimit të eshtrave të veprimtarëve të LDK-së

Deputeti i LDK-së, Lutfi Haziri, ka reaguar pasi u identifikuan mbetjet mortore të 23 personave, të cilat ishin zhvarrosur së fundmi në Mitrovicë.

Ai njoftoi se mes të identifikuarve ndodhen Idriz Rrecaj, kryetar dhe drejtues i LDK-së në Skënderaj e Drenicë, Adem Beqiri, anëtar i Kryesisë së Degës së LDK-së në Mitrovicë, si dhe bashkëveprimtari i tyre, Sali Mziu.

Sipas Hazirit, ata ishin patriotë dhe veprimtarë që dhanë një kontribut të madh për lirinë dhe pavarësinë e Kosovës.

Në reagimin e tij, Haziri shkroi se, në ditët kur Kosova është ngritur për të dëshmuar se “Liria ka Emër”, mbërriti lajmi për ndriçimin e një prej krimeve të kryera ndaj grupit të intelektualëve dhe njerëzve që drejtuan rezistencën në Skënderaj, Drenicë e Mitrovicë.

Ai theksoi se, pas më shumë se 27 vitesh si të zhdukur, mes 23 personave të zhvarrosur së fundmi në Mitrovicë janë identifikuar edhe mbetjet mortore të Idriz Rrecajt dhe Adem Beqirit. Haziri i përshkroi ata si veprimtarë të njohur të çështjes kombëtare, të cilët udhëhoqën rezistencën dhe kryengritjen për liri në Skënderaj e Mitrovicë. Po ashtu, janë identifikuar edhe mbetjet e bashkëveprimtarit të tyre, Sali Mziut.

Haziri deklaroi se ata ishin idealistë, patriotë dhe kontribuues të mëdhenj për lirinë e pavarësinë, të cilët përmes shembullit të tyre treguan se si duhet dashur atdheu.

Ai e përshkroi këtë si një rrugëtim të gjatë 27-vjeçar, të mbushur me mall dhe pritje, duke thënë se tashmë është zbuluar heroizmi i tyre dhe mizoria e ushtruar ndaj tyre. Sipas tij, shpirtrat e tyre ndriçojnë Republikën për të cilën u flijuan.

“Lavdi e përjetshme!”, përfundoi Haziri.