Luan Gacaferi, pjesëtar i partisë Guxo, ka publikuar një reagim të fortë në platformat sociale, duke akuzuar kundërshtarët e kryeministrit në detyrë Albin Kurti dhe një pjesë të analistëve për përhapje të gjuhës së urrejtjes, dezinformatave dhe thirrjeve që dëmtojnë shtetin.
Të lidhura
None found
Sipas tij, disa figura publike krahasojnë padrejtësisht Policinë e Kosovës me regjimin e Slobodan Millosheviqit, bëjnë thirrje kundër luftimit të korrupsionit, kundërshtojnë krijimin e institucioneve dhe shpërndajnë lajme të rreme që krijojnë frikë te qytetarët.
Në postimin e tij, Gacaferi ka renditur një sërë akuzash konkrete. Ai përmend se ka individë që e quajnë Kurtin ‘Albin Serbia’ dhe ‘Albin Millosheviqi’, si dhe kërkojnë eliminimin e tij me çdo mjet të mundshëm, duke ofenduar dhe kërcënuar pa ndërprerë.
Po ashtu, këta zëra e krahasojnë Policinë e Kosovës me atë të Millosheviqit, duke e akuzuar se fsheh armë për të fajësuar civilë serbë të pafajshëm. Disa prej tyre shprehin kundërshtim për një shtet mbi baza etnike dhe pretendojnë se pakicat gëzojnë të drejta të tepruara në Kosovë, ndërsa të tjerë kërkojnë t’u hiqet e drejta e votës ‘Gerrnaqave’, pavarësisht garancive kushtetuese për çdo shtetas mbi 18 vjeç.
Gacaferi akuzon gjithashtu ‘analistët’ që, sipas tij, shpifin natë për natë, prodhojnë lajme të rreme dhe krijojnë frikë e pasiguri; si dhe ata që bëjnë thirrje të hapur për bllokadë në krijimin e institucioneve shtetërore.
Ai shton se nëpër studio televizive është bërë thirrje që korrupsioni të mos luftohet, sepse Kosova gjoja nuk mund të funksionojë pa të, dhe që fabrikat ushqimore si ‘Vita’ të mos inspektohen.
Në fund të reagimit, ai i drejtohet drejtpërdrejt z. Mushkolaj, duke e përfshirë si pjesëmarrës në këto thirrje, dhe e mbyll me një citim të kryeministrit Kurti: “Veç vonim ka, se shpëtim nuk ka pa u bo ky shtet me të gjitha institucionet, përfshirë këtu edhe drejtësinë.”
