Kush po kërkon luftë në Kosovë?”, Dosti kritikon ashpër deklaratat politike

Publicisti dhe analisti Adriatik Riza Dosti ka reaguar me tone të forta ndaj deklaratave të disa politikanëve për mundësinë e dënimit të ish-drejtuesve të UÇK-së.

Përmes një shkrimi, Dosti kundërshton retorikën që, sipas tij, rrit tensionet dhe lë të kuptohet se në Kosovë mund të rikthehet dhuna nëse Hashim Thaçi, Kadri Veseli dhe të tjerë do të përballeshin me një vendim të pafavorshëm.

Ai përmend disa deputetë e figura politike, të cilët i akuzon se po përdorin gjuhë agresive dhe kërcënuese në lidhje me këtë çështje.

“Janë disa deputetë të çmendur, agresivë por edhe burracakë që bëjnë thirrje të tilla se nëse Haga i dënon ‘luftëtarët tanë’ të UÇK-së, krejt Kosova ka me u kallë”, shkruan Dosti.

Analisti e quan të papërgjegjshme edhe mënyrën se si disa deklarata ia atribuojnë NATO-s përgjegjësinë për zhvillimet që mund të pasojnë në Kosovë.

Në reagimin e tij, Dosti ndalet te Ganimete Musliu, Isa Mustafa, Sami Lushtaku dhe Kujtim Shala, duke komentuar qëndrimet dhe deklaratat e tyre në debatin politik.

Sipas tij, një pjesë e deputetëve të PDK-së dhe AAK-së kanë shtuar paralajmërimet për “luftë”, ndërsa disa përfaqësues të LDK-së janë shfaqur më të matur në prononcimet e tyre.

“Ja lirohet Hashimi, ja i vumë zjarrin Kosovës”, shkruan Dosti, duke ironizuar me mënyrën se si, sipas tij, po artikulohet kjo çështje nga skena politike.

Ai thekson se Kosova nuk duhet të shndërrohet në një hapësirë konflikti dhe se përdorimi i armëve kundër institucioneve apo rendit kushtetues do të nënkuptonte përballje me vetë Kosovën dhe qytetarët e saj.

“Me kë do luftoni e kundër kujt… kundër Kosovës e popullit të saj… kundër Amerikës, NATO-s, KFOR-it, kundër BE-së, PE-së e Hagës?”, shkruan ai.

Dosti kritikon gjithashtu partitë opozitare për performancën e tyre politike, duke vlerësuar se qytetarët e Kosovës ua kanë dhënë përgjigjen përmes votës.

Në përmbyllje, ai paralajmëron se çdo përpjekje për të vepruar kundër Kosovës do të hasë në kundërshtim dhe u kërkon politikanëve të mos e përdorin UÇK-në dhe sakrificën e saj si pjesë të retorikës politike.

“Ndaj larg duart tuaja të pista nga nderi e lavdia e Kosovës dhe e UÇK-së, në emër të të cilave keni folur e vepruar deri më sot”, përfundon Dosti.