Kryeministri në detyrë i Kosovës, Albin Kurti, zhvilloi një takim pritës me ambasadoren e sapoemëruar të Suedisë, Åsa Pehrson, me të cilën ishte takuar për herë të parë dy dekada më parë në kryeqytetin suedez.
Të lidhura
None found
Gjatë bisedës, Kurti shprehu mirënjohjen e thellë të Kosovës për përkrahjen e palëkundur që Suedia i ka ofruar vendit dhe qytetarëve të tij, si në periudhën para çlirimit dhe shpalljes së pavarësisë, ashtu edhe në vazhdimësi.
Duke e cilësuar Suedinë si një partnere të ngushtë dhe një nga pesë donatorët kryesorë të Kosovës, kryeministri theksoi kontributin e mijëra ushtarëve suedezë brenda misionit të KFOR-it. Ai kujtoi gjithashtu se Suedia u bë strehë për familje të shumta shqiptare nga Kosova, përfshirë edhe minatorët e Trepçës që lanë vendin pas grevës së vitit 1989.
Përtej raporteve dypalëshe, takimi me ambasadoren Pehrson shërbeu edhe për të shqyrtuar mundësitë e zgjerimit të bashkëpunimit në fusha si ekonomia, tregtia, energjetika dhe mbrojtja. Po ashtu, u prekën edhe temat e aktualitetit politik dhe dinamikat në rajon.
Nga ana e saj, ambasadorja Pehrson u shpreh se shërbimi në cilësinë e përfaqësueses diplomatike në Kosovë ka qenë prej kohësh një aspiratë e saj personale.
