Kurti i propozon Hamzës marrëveshje për postin e Kryetarit të Kuvendit: PDK-së i ofrohet një nga tri pozitat e larta shtetërore

Lideri i LVV-së, Albin Kurti, i është drejtuar me letër kryetarit të Partisë Demokratike të Kosovës, Bedri Hamza, duke i propozuar që PDK-ja të marrë drejtimin e Kuvendit të Republikës së Kosovës.

Në letrën e tij, Kurti thekson se konstituimi i Kuvendit dhe zgjedhja e presidentit të ri duhet të realizohen me pjesëmarrjen e të gjithëve, në përputhje me kërkesat kushtetuese.

Kurti e ka falënderuar Hamzën për përgjigjen e dhënë gjatë ditës, ndërsa ka shprehur moskuptimin e tij për refuzimin e një takimi mes tyre. Sipas tij, çështjet që lidhen me institucionet e Republikës dhe interesin e qytetarëve duhet të diskutohen përmes komunikimit politik dhe kolegjial, drejtpërdrejt dhe jo vetëm përmes letrave zyrtare.

Ai ka thënë se e respekton vendimin e PDK-së për të qëndruar në opozitë, por ka nënvizuar se edhe formimi i Kuvendit, edhe zgjedhja e presidentit ose presidentes së re duhet të bëhen bashkë nga të gjitha palët, ashtu siç përcakton Kushtetuta, për të cilën deputetët e rinj u betuan dje.

Kurti i është referuar gjithashtu përfundimit të letrës së Hamzës, ku thuhet se PDK-ja do të kontribuojë në konstituimin e Kuvendit të Republikës së Kosovës. Sipas tij, në këtë fazë, kontributi i PDK-së lidhet me propozimin e emrit për nënkryetar nga kjo parti, i cili mund të zgjidhet vetëm pasi edhe deputetët e LVV-së të votojnë pro tij ose saj.

Lideri i LVV-së ka vlerësuar se PDK-ja mund të japë një kontribut më të madh në procesin e zgjedhjes së presidentit ose presidentes së re. Ai ka argumentuar se kjo do të shmangte mbajtjen e një palë zgjedhjeve të tjera, të cilat i konsideron të panevojshme, të paarsyeshme dhe të dëmshme për buxhetin e shtetit dhe ekonominë e vendit.

Pasi Hamza ka refuzuar takimin, Kurti ka përsëritur ofertën e tij për PDK-në. Ai ka deklaruar se, në këmbim të qëndrimit të deputetëve të saj në sallë dhe pjesëmarrjes në votimin për presidentin ose presidenten e re të Republikës, LVV-ja është e gatshme të bëjë rokadën mes pozitës së nënkryetarit ose nënkryetares së Kuvendit që i takon PDK-së dhe postit të kryetarit ose kryetares së Kuvendit, që do të drejtohej nga LVV-ja.

Sipas Kurtit, një marrëveshje e tillë do të përbënte kontribut të PDK-së dhe njëkohësisht do t’i siguronte kësaj partie drejtimin e njërit prej tri posteve të larta politike shtetërore në Republikën e Kosovës.