Kurti dhe Hargreaves diskutojnë për përmbylljen e krijimit të institucioneve

Kryeministri Albin Kurti zhvilloi sot një takim me ambasadorin e Mbretërisë së Bashkuar, Jonathan Hargreaves.

Gjatë takimit, ambasadori e uroi Kurtin për Qeverinë dhe mandatin e ri. Të dyja palët shprehën gatishmërinë për të vijuar bashkëpunimin dhe për të çuar më tej marrëdhëniet e ndërsjella që Kosova dhe Mbretëria e Bashkuar kanë ndërtuar ndër vite.

Sipas njoftimit të kryeministrisë, biseda u përqendrua te zhvillimet e fundit politike, me vëmendje të veçantë te përfundimi i procesit të formimit të institucioneve.

Kryeministria bëri të ditur se Qeveria e Republikës së Kosovës synon të forcojë më tej lidhjet me Mbretërinë e Bashkuar dhe të zgjerojë partneritetin strategjik mes dy vendeve. Në këtë kuadër, bashkëpunimi pritet të thellohet në tregti, investime, teknologji dhe sport, përfshirë përgatitjet për Lojërat Mesdhetare.