Pas takimit me presidenten e Komisionit Evropian, Ursula von der Leyen, kryeministri i Kosovës, Albin Kurti, komentoi edhe vendimin e fundit të Dhomave të Specializuara të Kosovës në Hagë.
Të lidhura
None found
Ai shprehu shqetësim për disa prej përfundimeve të gjykatës dhe për dënimet e dhëna, ndërsa nënvizoi tri elemente të aktgjykimit që, sipas tij, duhet të bëhen të njohura në nivel ndërkombëtar.
Kurti tha se pretendimet për të ashtuquajturën “Shtëpi të Verdhë” dhe trafikimin e organeve nuk kanë qenë pjesë e aktakuzës.
“Së pari, pretendimet për të ashtuquajturën «Shtëpi të Verdhë» dhe trafikimin e organeve nuk janë përfshirë në aktakuzë”, deklaroi ai.
Si pikë të dytë, kryeministri përmendi faktin se gjykata i ka rrëzuar akuzat për krime kundër njerëzimit, si dhe për sulme të gjera e sistematike ndaj popullsisë civile.
“Së dyti, akuzat për krime kundër njerëzimit dhe sulme të gjera e sistematike kundër popullsisë civile janë rrëzuar”, u shpreh Kurti.
Elementi i tretë, sipas tij, lidhet me sqarimin e Dhomave të Specializuara se Ushtria Çlirimtare e Kosovës nuk është subjekt i gjykimit.
“Së treti, Dhomat e Specializuara e kanë bërë të qartë se Ushtria Çlirimtare e Kosovës nuk është në gjyq dhe se aktgjykimi i tyre nuk ka për qëllim të dëmtojë drejtësinë apo legjitimitetin e luftës çlirimtare”, tha ai.
Kurti theksoi se, përveç këtyre pikave, Qeveria e Kosovës mbetet e shqetësuar për përfundime të tjera të vendimit dhe për masën e dënimeve të shqiptuara.
Ai deklaroi se pret që këto çështje të rishikohen në fazën e apelit, duke argumentuar se në aktgjykim mund të ketë pasaktësi në aspektin faktik, historik dhe juridik.
“Kemi gjithashtu shqetësime të mëdha për përfundime të tjera dhe për dënimet e rënda. Vlerësojmë se ato përmbajnë gabime faktike, historike dhe juridike dhe presim që të korrigjohen në apel. Drejtësia duhet të jetë e paanshme dhe të perceptohet e të përjetohet si e tillë”, deklaroi kryeministri.
Gjatë deklarimit, Kurti foli edhe për personat që kanë pësuar dhunë seksuale gjatë luftës në Kosovë. Ai kërkoi që autorët e këtyre krimeve të përballen me drejtësinë.
“Afërsisht 20,000 persona janë viktima të dhunës seksuale gjatë luftës në Kosovë, ndërsa shumë prej kryerësve ende nuk janë ndëshkuar. Kosova kërkon drejtësi për secilën viktimë, për çdo krim dhe për çdo kryerës”, tha Kurti.
Sipas tij, nuk duhet të lejohet krijimi i narrativave që vendosin përgjegjësitë për krimet në të njëjtin nivel.
“Nuk mund të lejojmë që përgjegjësia dhe fajësia të barazohen vetëm sepse dikush dëshiron të ndërtojë narrativa alternative”, u shpreh ai.
Në përfundim, kryeministri falënderoi Ursula von der Leyen për vizitën e saj në Kosovë dhe deklaroi se vendi është gati të vijojë procesin e integrimit evropian.
“Presidente von der Leyen, ju falënderoj edhe një herë me gjithë zemër që ndodheni këtu. Kosova e ka përmbushur pjesën e saj dhe është e gatshme për hapin e radhës drejt anëtarësimit në Bashkimin Evropian”, përfundoi Kurti.
