Një akuzë e hapur ka ardhur nga aktivisti shqiptaro-amerikan Ramazan Bekteshi, i cili ka vënë në shënjestër drejtpërdrejt kreun e Aleancës për Ardhmërinë e Kosovës, Adrian Gjini, duke kërkuar transparencë mbi shumën prej 53 milionë eurosh në dritën e dënimit të ish-ministrit Pal Lekaj.
Të lidhura
None found
Përmes një postimi në Facebook, Bekteshi e drejton fokusin kah destini i këtyre fondeve të mëdha publike dhe pyet nëse paratë do të kthehen ndonjëherë në arkën e shtetit. Ai vë në dyshim narrativin politik të AAK-së kundrejt Lëvizjes Vetëvendosje, duke theksuar se përgjegjësia nuk mbaron me një vendim gjykate.
“53 milionë euro, jo 53! Pal Lekaj mori një dënim prej 3 vjet e 8 muaj burg për këtë dosje. Tani e pyes Adrian Gjinin dhe gjithë AAK-në: Ku ndodhen këto para?” shkruan Bekteshi në reagimin e tij.
Ai shton më tej se dënimi me burg mund të përfaqësojë një formë llogaridhënieje, por miliona eurot që u përkasin qytetarëve nuk zhduken automatikisht me shpalljen e aktgjykimit. Sipas tij, partia po përpiqet ta paraqesë këtë si një sukses politik, ndërsa etiketon kryeministrin Kurti dhe VV-në si kriminelë të mëdhenj.
“Janë të hollat e popullit të Kosovës. Kush i përfitoi dhe ku shkuan? Nëse vërtet ka pasur dëmtim të interesit publik, atëherë publiku ka të drejtën e një përgjigjeje konkrete dhe gjurmimit të çdo centi”, vijon ai.
Bekteshi e mbyll qëndrimin e tij me një pyetje provokuese drejtuar kreut të AAK-së, duke ironizuar logjikën sipas së cilës partia akuzon VV-në për krime të rënda, teksa përballë një dënimi për keqpërdorim të një shifre marramendëse, përgjigja duket e zbehtë. “Si e shpjegoni ju këtë dukuri, zoti Gjini? AAK-ja vjedh, por VV-ja është super-kriminale? Nëse për 53 milionë euro dënimi është kaq i ulët, çfarë sinjali i jepet shoqërisë? Një ndëshkim si për armëmbajtje pa leje? Vjedh miliona dhe paguan një çmim simbolik?”
Më tej, ai komenton me ironi se tashmë AAK-ja është konfirmuar si një mbrojtëse e përkushtuar dhe pasionante e Lekajt dhe rrethit të tij, duke e cilësuar këtë qëndrim si një afrim të hapur.
