Deputetja e Lëvizjes Vetëvendosje, Arbëreshë Kryeziu-Hyseni, tha se Partia Demokratike e Kosovës nuk është në pozitë të vendosë kushte për bisedimet rreth presidentit. Ajo iu referua qëndrimit të PDK-së se këto bisedime nuk mund të zhvillohen pa u votuar më parë plotësim-ndryshimi i Ligjit për Dhomat e Specializuara.
Të lidhura
None found
Në një deklaratë për media, Kryeziu-Hyseni e cilësoi çështjen e presidentit si shumë të rëndësishme për mënyrën se si do të ecë Kosova përpara. Sipas saj, votimi i ligjit nuk duhet të vendoset si kusht për nisjen e bisedimeve. Ajo kërkoi që të lihen mënjanë interesat personale, ndonëse tha se një gjë e tillë po duket e pamundur për këto parti, dhe shtoi se PDK-ja është e fundit që mund të bëjë kushtëzime të tilla.
Ndërkaq, deputeti i PDK-së, Eman Rrahmani, tha se ligji për Specialen është përparësia kryesore në këto momente. Sipas tij, fillimisht duhet trajtuar ky ligj e më pas hapat e tjerë, pasi për deputetët nuk ka gjë më të rëndësishme sesa të mundësojnë një gjykim të drejtë.
