Pas vrasjes së Arlinda Zekajt në Pejë, më 25 tetor, Kryeprokurori i Shtetit ka kërkuar një raport të hollësishëm për mënyrën si janë trajtuar rastet e saj. Ai ka autorizuar gjithashtu analizimin e reagimit të institucioneve ndaj saj.
Zyra e Kryeprokurorit të Shtetit bëri të ditur se shqyrtimin do ta udhëheqë koordinatori nacional për rastet e dhunës në familje.
Të lidhura
None found
Kryeprokurores së Prokurorisë Themelore në Pejë, Lumturije Vuçetaj, i është kërkuar të dorëzojë raport me shkrim, ku paraqitet kronologjia e rasteve.
Në raport duhet të evidentohen personat e raportuar, kualifikimi juridik i rasteve dhe prokurorët përgjegjës për trajtimin e tyre. Po ashtu, kërkohen hollësi për veprimet procedurale, kohën kur janë kryer dhe arsyet që kanë mbështetur vendimet.
Shqyrtimi do të përfshijë edhe vlerësimin e rrezikut, masat e ndërmarra për mbrojtjen e viktimës dhe bashkëpunimin ndërinstitucional. Gjithashtu, duhet të sqarohet se si është trajtuar shkresa e Zekajt e datës 22 tetor 2026.
Kryeprokurori i Shtetit i është drejtuar edhe Inspektoratit Policor të Kosovës, duke i kërkuar të kryejë veprime hetimore dhe verifikuese.
Inspektorati do të shqyrtojë se si janë pranuar, regjistruar, vlerësuar dhe trajtuar në polici raportimet e Zekajt. Verifikimet synojnë të përcaktojnë nëse veprimet policore kanë qenë të ligjshme, si dhe të identifikojnë përgjegjësi të mundshme individuale apo institucionale.
“Në rast se konstatohen shkelje të ligjit, neglizhencë apo mosveprime nga ana e zyrtarëve përgjegjës, do të ndërmerren masat përkatëse ligjore dhe do të kërkohet përgjegjësi për secilën shkelje të evidentuar”, thuhet në njoftim.
Zyra e Kryeprokurorit të Shtetit ka deklaruar se çështja do të trajtohet me seriozitet dhe urgjencë. Hapat e ardhshëm do të caktohen pasi të pranohen dhe analizohen dokumentet dhe raportet përkatëse.
