Konjufca merr pjesë në ministerialin e Marco Rubios në Washington, diskuton kërcënimin e terrorizmit politik

Ministri në detyrë i Punëve të Jashtme dhe Diasporës, Glauk Konjufca, ka njoftuar se ka marrë pjesë në Washington D.C. në një takim ministror të fokusuar te shtimi i rrezikut nga terrorizmi politik. Takimi është organizuar nga Sekretari amerikan i Shtetit, Marco Rubio.

Në një reagim në Facebook, Konjufca ka vlerësuar se prania e Kosovës në këtë ministerial i krijon vendit mundësinë që të marrë pjesë në përpjekjet ndërkombëtare për parandalimin e terrorizmit politik dhe për fuqizimin e mekanizmave të sigurisë.

Ai ka theksuar se terrorizmi politik po shfaqet në forma gjithnjë e më të organizuara dhe nuk kufizohet më brenda territoreve shtetërore. Sipas Konjufcës, kjo dukuri shfrytëzon rrjetet ndërkombëtare, financimin dhe hapësirën digjitale për të dëmtuar stabilitetin dhe institucionet demokratike.

Konjufca ka deklaruar se Shtetet e Bashkuara të Amerikës janë aleati më i afërt dhe partneri strategjik i Kosovës. Ai ka nënvizuar se bashkëpunimi me SHBA-në dhe vendet partnere është thelbësor për krijimin e një mjedisi më të sigurt dhe ruajtjen e vlerave mbi të cilat mbështeten demokracitë.

Sipas tij, Kosova do të vazhdojë të japë kontribut në çdo nismë që forcon bashkëpunimin ndërkombëtar dhe që i shërben paqes e sigurisë globale.