Gjeneralmajori turk Ozkan Ulutaş, komandant i KFOR-it, e ka përgëzuar kryeministrin në detyrë të Kosovës, Albin Kurti, për fitoren e tij dhe të Lëvizjes Vetëvendosje në zgjedhjet e 7 qershorit.
Të lidhura
None found
Sipas njoftimit të Kryeministrisë, urimi është përcjellë të mërkurën, gjatë takimit mes dy zyrtarëve në selinë e Qeverisë së Kosovës në Prishtinë.
Në njoftim thuhet se në fillim të takimit, i cili përkoi me ditën e certifikimit të rezultatit përfundimtar të zgjedhjeve të parakohshme për Kuvendin e Kosovës, Kurti mori urimet nga gjeneralmajor Ulutaş për fitoren e 7 qershorit.
Po ashtu, sipas komunikatës, gjatë këtij takimi është biseduar për zhvillimet e fundit politike, si edhe për gjendjen e sigurisë në vend dhe në rajon.
Njoftimi thekson në fund se, përveç angazhimit për ruajtjen e paqes, sigurisë dhe stabilitetit, pjesë e diskutimit ishte edhe bashkëpunimi i mirë mes institucioneve të Republikës së Kosovës dhe KFOR-it, si dhe mundësitë për zgjerimin dhe thellimin e tij.
