Reagime të forta në Kosovë kanë pasuar deklaratat e fundit të ministres serbe Snezhana Paunoviq, e cila tashmë është shpallur person i padëshiruar dhe nuk lejohet të hyjë në territorin e Kosovës.
Të lidhura
None found
Profesori Muhamet Kelmendi vlerëson se qëndrimet e saj pasqyrojnë vazhdimësinë e politikës zyrtare që Serbia ndjek ndaj Kosovës. Për këtë arsye, ai kërkon përgjigje më të vendosur nga institucionet, si në planin diplomatik, ashtu edhe në drejtim të fuqizimit të aftësive mbrojtëse të vendit.
Sipas Kelmendit, shpallja e saj non grata përbën një vendim të drejtë, por nuk është masë e mjaftueshme. Ai kërkon që hyrja në Kosovë t’u ndalohet gjithashtu presidentit Aleksandar Vuçiq dhe ministrit Ivica Daçiq, ndërsa institucionet duhet të shqyrtojnë nisjen e procedurave ligjore kundër zyrtarëve serbë që, sipas tij, përhapin urrejtje racore ose bëjnë deklarata kërcënuese.
Ai e përshkruan Sbezhana Paukoviçin si ultranacionaliste serbe dhe e lidh atë me rrethet e një plejade nacionalfashistësh serbë, të udhëhequr nga pikëpamje revanshiste, të cilët kanë qenë të përfshirë në katër luftëra dhe konflikte në Ballkan.
Kelmendi thotë se deklarata e saj nuk duhet parë si një qëndrim individual, pasi, sipas tij, ajo shpreh pozicionin e qeverisë dhe të shtetit serb në tërësi. Ai shton se të njëjtën qasje e ka paraqitur edhe Ivica Daçiç, të cilin e quan racist serb, përmes deklaratës: “Kushdo që nuk është serb të iki në Shqipëri”.
Sipas profesorit, as në pushtet dhe as në opozitë nuk mund të gjendet ndonjë subjekt i madh politik serb me një qëndrim tjetër nga synimi për rikthimin e Kosovës dhe serbizimin e territorit dardan. Në këtë rrethanë, ai e konsideron të drejtë shpalljen e kësaj figure si person non grata, por këmbëngul se veprimi nuk duhet të përfundojë me kaq.
Ai kërkon që Qeveria e Kosovës të ndërmarrë masa edhe ndaj vetë qeverisë serbe, presidentit Vuçiç dhe Daçiçit. Kelmendi thekson se nuk ka arsye për të pritur dhe se autoriteteve kosovare u takon të ndalojnë hyrjen e tyre në vend, si dhe të vlerësojnë mundësinë e procedurave ligjore ndaj personave që nxisin urrejtje racore apo artikulojnë kërcënime.
Deklaratat e fundit të zyrtarëve serbë, sipas Kelmendit, dëshmojnë se shteti serb nuk i ka ndryshuar qëndrimet ndaj Kosovës. Ai vlerëson se pozicioni i Serbisë bëhet i dukshëm pikërisht përmes deklaratës së ministres serbe.
Kelmendi kërkon reagim jo vetëm nga institucionet e Kosovës, por edhe nga shteti shqiptar, Bashkimi Evropian dhe Shtetet e Bashkuara të Amerikës. Përballë kërcënimeve që ai i cilëson radikale dhe fashiste, sipas tij, nevojiten qartësi politike dhe veprim institucional.
Në të njëjtën kohë, ai thekson se Kosova duhet të krijojë një polici dhe një ushtri të aftë për mbrojtjen e Republikës. Një forcë ushtarake me 4 mijë ushtarë, sipas tij, nuk mjafton për nevojat e mbrojtjes, ndaj vendit i duhet një ushtri aktive më e madhe dhe një polici e aftë, e pajisur mirë.
Profesori kërkon gjithashtu përmirësimin e kushteve të punës në sektorin e sigurisë dhe përshtatjen e të ardhurave me gjendjen ekonomike. Ai shpreh shpresën se qeveria e ardhshme do t’i zgjidhë këto çështje, duke paralajmëruar se koha po kalon shpejt dhe se situata kërkon vigjilencë, si dhe përgatitje ushtarake e institucionale për mbrojtjen e vendit.
